O Dariu no Medai te tahi atu arii no Babulonia. Ua ite Dariu e mea taa ê o Daniela. Ua faatoroa oia ia Daniela ei tiaau o te mau taata faufaa roa ˈˈe o te fenua. Ua pohehae teie mau taata ia Daniela e ua hinaaro ratou e haapohe ia ˈna. Ua ite ratou e ua matau Daniela i te pure ia Iehova e toru taime i te mahana taitahi. Ua ani ïa ratou ia Dariu: ‘E te arii e, e mea tia ia faanaho i te hoê ture o te faahepo ra i te taata taitahi ia pure ia oe anaˈe. Te taata râ o te ore e auraro i te reira, e hurihia ïa oia i roto i te hoê apoo î i te mau liona.’ Mea au na Dariu teie manaˈo e ua tarima oia i te ture.

A faaroo ai Daniela i teie ture apî, ua haere oia i roto i to ˈna fare. I mua i te hoê haamaramarama tei vai matara, ua tuturi Daniela e ua pure oia ia Iehova. Ua tomo taue te mau taata pohehae i roto i te fare o Daniela e ua ite atura ratou ia ˈna o te pure ra. Ua haere ratou e faaite i te reira ia Dariu a na ô ai ratou: ‘Te faaroo ore ra Daniela ia oe. Te pure nei oia i to ˈna Atua e toru taime i te mahana taitahi.’ Mea au na Dariu ia Daniela e aita oia i hinaaro ia pohe Daniela. I te roaraa o te mahana, ua imi te arii i te hoê ravea no te faaora ia Daniela. Aita râ te arii i nehenehe e taui i te hoê ture ta ˈna i tarima aˈena. E titauhia ia ˈna ia faaue i ta ˈna mau taata ia huri ia Daniela i roto i te apoo î i te mau liona taehae roa.

 I taua po ra, ua haapeapea roa Dariu no Daniela e aita oia i nehenehe e taoto faahou. I te poipoi aˈe, ua horo te arii i te apoo e ua tuô oia ia Daniela ma te parau e: ‘Ua faaora anei to oe Atua ia oe?’

Ua faaroo Dariu i te hoê reo. O Daniela! Ua tuô oia ia Dariu: ‘Ua tapiri te melahi a Iehova i te vaha o te mau liona. Aita roa ˈtu ratou i haamauiui ia ˈu.’ Ua oaoa roa o Dariu! Ua faaue oia ia hutihia Daniela i rapae i te apoo. Aita hoê aˈe pepe i nia i te tino o Daniela. I muri iho, ua faaue atu te arii: ‘A huri i te mau taata tei faahapa ia Daniela i roto i te apoo.’ A hurihia ˈi teie mau taata i roto i te apoo, ua amu te mau liona ia ratou.

Ua horoa Dariu i teie faaueraa i to ˈna nunaa: ‘E mea tia i te taata taitahi ia mǎtaˈu i te Atua o Daniela. Ua faaora Oia ia Daniela i te mau liona.’

Te pure anei ra oe ia Iehova i te mau mahana atoa, mai ia Daniela?