Элээн үе эрткенде, Вавилоннуң хааны мидий уктуг Дарий апарган. Ол Даниилдиң өске улустан ылгалып турарын эскерип кааш, дүжүметтерниң чагырыкчызы кылдыр томуйлап каан. Ол улус Даниилге адааргааш, ону өлүрер деп бодап алган. Даниилдиң хүнде үш катап Иеговага мөргүп турарын олар билир болгаш, Дарийге: «О хаанывыс, силерден өске кымдан-даа диленип, чалбарывас деп хоойлу херек. Ол хоойлуну үрепкен кижини арзылаңнарлыг оңгарже октаптар» — дээннер. Дарий аңаа таарзынгаш, ол хоойлуга атты салган.

Даниил чаа хоойлунуң дугайында дыңнааш-даа, ажык соңгазының чанынга дис кырынга олуруп алгаш, Иеговага мөргүп эгелээн. Ол үеде ишти ирик удурланыкчылар Даниилдиң бажыңынче шургуп киргеш, ооң мөргүп турарын көрүп каан. «Даниил хоойлуңарны үрепкен. Ол Бурганга хүнде үш катап мөргүп турар-дыр» — деп, олар хаанга хоптанган. Даниил хаанның сеткилинге кирер чораан, ынчангаш ол ону өлүмден канчаар камгалаарыл деп хүнзедир боданган. Ынчалзажок хоойлуда атты салган болганда, хаан боду безин ону өскертип шыдавас турган. Ынчангаш Дарий Даниилди каржы арзылаңнарлыг оңгарже киир октаптарын дагзыр ужурга таварышкан.

 Даниил дээш дүвүреп, Дарий хондур удуп чадап каан. Даң бажыңда хаан оңгарже халып чеде бергеш: «Даниил, сени Бурганың камгалады бе?» — деп алгырган.

Оңгардан үн: «Иегованың ангели арзылаңнарның аастарын дуй тудуп алырга, олар меңээ дегбеди» — дээн. Дарий амырааш, ону оңгардан уштуп эккээр кылдыр дужааган. Даниилде чаңгыс-даа балыг чок болган. Оон хаан Даниилди нүгүлдээн улусту ол-ла оңгарже киир октапкан. Аштаан арзылаңнар оларже дораан-на халдай берген.

Ооң соонда Дарий: «Шупту улус Даниилдиң Бурганын хүндүлеңер. Ол Даниилди арзылаңнардан камгалап каан» деп хоойлу үндүрген.

Даниил ышкаш, Иеговага хүннүң-не мөргүп турар сен бе?