Te Darío yuʼun Medopersia jaʼ yan ajwalil yuʼun Babilonia. La yil te ay spʼijil te Daniel, jaʼ yuʼun la yakʼbey swentain te winiketik te mukʼ skʼoplalik ta lum-abi. Te winiketik-abi la sbikʼtal oʼtantayik te Daniel sok la skʼan smilik. Snaʼojik te oxeb buelta ya skʼopon Jehová ta jujun kʼajkʼal te Daniele, jich yuʼun la yalbeyik te Darío: “Mukʼul ajwalil, ya skʼan te ayuk jun ley te banti ya yal te jaʼnax ya awichʼ kʼoponele. Teme ay machʼa ya skʼaxuntay te leye, akʼa yichʼ chʼojel ochel ta schʼen leon chojetik”. Te Darío lek la yaʼiy te bin albote, jich la spas firmar te leye.

Kʼalal te Daniel la snaʼ stojol te yachʼil leye, bajtʼ ta sna. Tey-abi, la skejan sba sok la skʼopon te Jehová ta stsʼeel te bentana te jamal aye. Te winiketik te ay sbikʼtal yoʼtanik ta stojole, ochik ta sna te Daniel te kʼalal yak ta skʼoponel-a te Diose. Jich animalnax bajtʼik ta yalbeyel te Darío: “Te Daniel la skʼaxuntaybat te akʼope. Ya skʼopon oxeb buelta ta jujun kʼajkʼal te Dios yuʼune”. Te Darío lek ya yilbey stalel te Daniel, jich ma skʼan te ya yichʼ milele. Sjunal kʼajkʼal la snopilan te bin ya spas swenta maba ya yichʼ milel, pero ma xjuʼ yuʼun sjelontes te ley te pasbilix firmare. Jich yuʼun maʼyuk bin juʼ la spas, la yakʼ te ya yichʼ chʼojel ochel te Daniel ta schʼen te jtiʼawal chojetike.

 Ta ajkʼabal-abi, te Darío kʼax smeloj yoʼtan te ma x-och swayel ta skaj te Daniele. Ta sakubel kʼinal, animal bajtʼ yil te chʼen sok jich awun: “¡Daniel! ¿Labal skoltayat te Dios awuʼune?”.

Te Darío la yaʼiy te ay machʼa kʼopoje. Jaʼ te Daniel, te jich la yale: “Te chʼul-abat yuʼun te Jehová la smakbey ye te leon chojetike, jich maʼyuk bin la spasbonik”. Te Darío kʼax tseʼel yoʼtan yuʼun, jich la stikun ta lokʼesel te Daniel. Maʼyuk bin pasbot ta jkʼaxel te Daniel yuʼun te leon chojetike. Ta patil, te ajwalil la yal ta mantal: “¡Chʼojaik ochel ta chʼen te winiketik te la slebeyik smul te Daniele!”. Kʼalal la yichʼik chʼojel ochele, ta oranax tiʼotik yuʼun te leon chojetike.

Te Darío la yakʼ mantal ta stojol te lum yuʼune: “Ta apisilik ya skʼan ya awichʼik ta mukʼ te Dios yuʼun te Daniel. Jaʼ koltayot yuʼun ta stojol te leon chojetik”.

¿Jaxan te jaʼate? ¿Yabal akʼopon te Jehová ta spisil-ora jich bitʼil te Daniele?