Osoma yikuavo ya vialele o Bavulono, Dariu wo ko Media. Dariu wa mola okuti, Daniele wa kala omunu umue o likasi. Eye wa eca ku Daniele ocikele coku songuila alume va velapo vofeka. Alume vaco va suvukile Daniele kuenje va yonguile oku u ponda. Ovo va kũlĩhĩle okuti Daniele wa siata oku likutilila ku Yehova olonjanja vitatu veteke kuenje va sapuila Dariu hati: ‘A soma, ku kapiwe ocihandeleko cokuti, omanu vosi va sukila oku likutilila lika kokuove. Kuenje wosi ka pokola kocihandeleko o sukila oku imbiwa veleva limue lieyuka olohosi.’ Dariu wa sola ocisimĩlo caco kuenje wa kapa ondimbukiso kocihandeleko caco.

Eci Daniele a yeva ocihandeleko cokaliye, wa enda konjo yaye. Eye wa kekamẽla kolongolo kovaso yonjanela yimue ya kala upulule kuenje wa likutilila ku Yehova. Alume vana vo suvuka va tufuila onjo yaye kuenje vo sanga okuti o kasi oku likutilila. Ovo va lupukila ku Dariu kuenje va popia vati: ‘Daniele ka kasi oku pokola kokuove. Eye o likutilila ku Suku yaye olonjanja vitatu veteke.’ Dariu wa solele calua Daniele kuenje ka yonguile okuti eye o fa. Vokuenda kueteke liosi eye wa seteka oku sokolola ndomo a pondola oku yovola Daniele. Dariu ndaño okuti osoma, pole, ka ponduile oku pongolola ocihandeleko cimue eye a kapa ale ondimbukiso. Omo liaco, eye wa sukilile oku tuma alume vaye oku imba Daniele veleva limue muli olohosi via tema.

 Vuteke waco, Dariu wa sakalalele calua okuti ka tẽlele oku pekela. Komẽle wa lupukila keleva liolohosi kuenje wa kovonga Daniele hati: ‘A Daniele, Suku yove hẽ wa ku popela?’

Dariu wa yeva ondaka yimue. Ondaka yaco ya Daniele! Daniele wa tambulula Dariu hati: ‘Ungelo wa Yehova, wa yika ovimẽla violohosi. Ovio ka via ndingile cimue.’ Dariu wa sanjukile calua! Kuenje wa handeleka okupa Daniele keleva. Pole, Daniele lapamue a lemehiwa. Kuenje soma wa handeleka hati: ‘Alume vana va lundila Daniele va imbiwe veleva liolohosi.’ Eci alume vaco va imbiwa veleva, va takĩliwa lolohosi.

Dariu wa tuma ocihandeleko eci komanu vaye cokuti: ‘Omanu vosi va sukila oku sumbila Suku ya Daniele. Eye wa popela Daniele kolohosi.’

Wa siata hẽ oku likutilila ku Yehova oloneke viosi ndeci Daniele a linga?