NGUDO 64
Daniele Dindini Ḽa Dzindau
Iṅwe khosi ya Babele yo vha i Dario wa Meda. Dario o vhona uri Daniele o vha o khethea. A ita uri Daniele a range phanḓa vhanna vha nṱha vhukuma vha ḽenelo shango. Vhenevha vhanna vha vha na vivho kha Daniele nahone vha ṱoḓa u mu vhulaha. Vho vha vha tshi zwi ḓivha uri Daniele u rabela Yehova luraru ḓuvha ḽiṅwe na ḽiṅwe, nga zwenezwo vha vhudza Dario vha ri: ‘Khosi yashu, hu tea u vha na mulayo wa uri hu fanelwa u rabelwa vhone fhedzi. Muthu ane a si thetshelese wonoyu mulayo u tea u posiwa dindini ḽa dzindau.’ Dario a takalela wonoyo muhumbulo, nahone a saina wonoyo mulayo.
Nga u ṱavhanya musi Daniele a tshi tou pfa nga ha wonoyu mulayo muswa, a ya nḓuni yawe. Phanḓa ha fasiṱere ḽo vuliwaho, a wa nga magona nahone a rabela Yehova. Vhanna vha re na vivho vha dzhena nga u ṱavhanya nḓuni yawe nahone vha mu wana a tshi khou rabela. Vha gidima vha ya ha Dario nahone vha ri: ‘Daniele o vha nyadza. U rabela Mudzimu wawe luraru ḓuvha ḽiṅwe na ḽiṅwe.’ Dario o vha a tshi funa Daniele nahone o vha a sa ṱoḓi uri a fe. Ḓuvha ḽoṱhe a ṱwa a tshi humbula nga nḓila ine a nga tshidza ngayo Daniele. Fhedzi na khosi yo vha i sa koni u shandula mulayo wo no sainiwaho. O vha o tea u vhudza vhanna vhawe uri vha pose Daniele dindini ḽa ndau dzo halifhaho.
Vhusiku honoho, Dario o vha a tshi khou vhilaela vhukuma nga Daniele lwe a si kone na u eḓela. Nga matsheloni, a gidima a ya dindini nahone a vhidzelela Daniele a ri: ‘Naa Mudzimu waṋu o ni tshidza?’
Dario a pfa ipfi. Ho vha hu Daniele! A vhidzelela Dario a ri: ‘Muruṅwa wa Yehova o vala milomo ya dzindau. A dzo ngo nkhuvhadza na luthihi.’ Dario o vha o takala vhukuma! A laedza uri Daniele a bviswe dindini. Daniele o vha a songo huvhala na luthihi. Nga murahu khosi ya laedza ya ri: ‘Posani vhanna vhe vha pomoka Daniele dindini ḽa dzindau.’ Musi vhenevho vhanna vha tshi posiwa dindini, ndau dza vha ḽa.
Dario a rumela ndaela yawe kha vhathu vhawe a ri: ‘Vhathu vhoṱhe vha tea u ofha Mudzimu wa Daniele. O tshidza Daniele kha dzindau.’
Naa ni a rabela kha Yehova ḓuvha ḽiṅwe na ḽiṅwe, u fana na Daniele?
“Huno Yehova u a ḓivha u ponyokisa milingoni vhathu vhane vha ḓikumedza khae.”—2 Petro 2:9
