Usa pa nga nagin hadi ha Babilonya amo hi Dario nga Medes. Nakita ni Dario nga hi Daniel may talagsahon nga abilidad. Gintokahan niya hi Daniel nga manguna ha pinakaimportante nga kalalakin-an ha iya nasasakopan. Ito nga kalalakin-an naawa kan Daniel ngan karuyag nira nga mamatay hiya. Maaram hira nga nag-aampo hi Daniel kan Jehova tulo ka beses kada adlaw, salit nagsiring hira kan Dario: ‘O hadi, sadang kita magkaada balaud nga an ngatanan ha imo gud la mag-ampo. Bisan hin-o nga diri sumunod hito ilalabog ha lungib nga puno hin leon.’ Naruyagan ni Dario ito nga ideya ngan ginpirmahan an balaud.

Pakabati ni Daniel han bag-o nga balaud, inuli hiya ha iya balay. Ha atubangan hin abrido nga bintana, linuhod hiya ngan nag-ampo kan Jehova. Tigda nga sumulod an naaawa nga kalalakin-an ngan naabtan hiya nga nag-aampo. Kinadto dayon hira kan Dario ngan nagsiring: ‘Diri ka ginsusunod ni Daniel. Nag-aampo hiya ha iya Dios tulo ka beses kada adlaw.’ Naoopayan hi Dario kan Daniel ngan nadiri hiya mamatay hi Daniel. Ha bug-os nga adlaw, naghinunahuna hiya kon paonan-o tatalwason hi Daniel. Pero bisan an hadi, diri makakagbag-o han balaud nga iya na ginpirmahan. Napiritan hiya nga ipalabog hi Daniel ha lungib han mabangis nga mga leon.

 Nabaraka gud hi Dario kan Daniel salit waray hiya mahingaturog han gab-i. Pagkaaga, kumadto dayon hiya ha lungib ngan sininggit kan Daniel: ‘Gintalwas ka ba han imo Dios?’

May nabatian nga tingog hi Dario. Tingog ito ni Daniel! Binaton hiya kan Dario: ‘Gintik-om han anghel ni Jehova an baba han mga leon. Waray nira ako labti.’ Nalipay gud hi Dario! Nagsugo hiya nga kuhaon hi Daniel ha lungib. Waray man la hi Daniel bisan usa nga kamras. An hadi nagsugo: ‘Ilabog ha lungib an mga nagpakaraot kan Daniel.’ Han ginlabog hira, ginkaon dayon hira han mga leon.

Iginpahibaro ni Dario ha katawohan ini nga sugo: ‘An ngatanan kinahanglan mahadlok ha Dios ni Daniel. Iya gintalwas hi Daniel tikang ha mga leon.’

Nag-aampo ka ba kan Jehova kada adlaw pariho kan Daniel?