Nanjary panjaka ta Babylony tao Dariosy Medianin̈y tafara tatỳ. Hitany Dariosy fa niavaka Daniela, ke nataony sefondro olo ambony aby io izy. Be fô Daniela iro, ke tihamono izy. Haindro fa nivavaka tamy Jehovah intelo isanandra Daniela. Ke ho iro tamy Dariosy: ‘Panjaka, anao man̈anova lalàn̈a mivolan̈a fa olo jiaby mila mivavaka aminao zaraiky fo. Zay olo tsy man̈araka zen̈y, hatsipy an̈aty lavaka lion.’ Nan̈eky Dariosy, ke nataony sonia lalàn̈a io.

Daniela koa fa naharen̈y lalàn̈a vaovao io, izy loso tantran̈onany tan̈y. Nibiafiny lafenaitara, ke tio izy nandohaliky ndreky nivavaka tamy Jehovah. Nijoko izy tao iro olo tsy tia izy aby io, ke takandro izy nivavaka. Iro baka tio nandeha tamy Dariosy tan̈y nalaky, nivolan̈a: ‘Daniela kony mbala mivavaka amy Zan̈aharinany intelo isanandra e!’ Tiany Dariosy Daniela, ke tsy tiany hofoaty. Nizaha hevitry izy baka han̈avotan̈a Daniela. Lalàn̈a koa fa nataony panjaka sonia, ndray izy tsy nahazo nan̈ova izio. Ke Daniela tsy maintsy natsipy tan̈aty lavaka feno lion masiaka.

 Nijaly jeriny Dariosy alin̈izio, ke tsy tafandry izy. Koa fa kiaka andra, izy nilomoay nandeha tamy lavaka io, baka io nikaiky: ‘A Daniela, namonjy anao ma Zan̈aharinao?’

Daniela nivolan̈a taminany: ‘Vavany lion aby io nafodiny anjeliny Jehovah, ke tsisy raha avoa zaho.’ Ravoravo mare Dariosy! Nirahiny nadoso tan̈aty lavaka tao Daniela. Tsisy raha avoa izy foeky. Panjaka nivolan̈a: ‘Atsipia an̈aty lavaka ao iro olo tsy tia Daniela io.’ Niaraka iro natsipy tao, efa laniny lion edy!

Dariosy baka tio nan̈aboaka didy: ‘Olo jiaby mila man̈eky Zan̈ahariny Daniela, fotony izy namonjy Daniela tamy lion.’

Asa anao mba mivavaka amy Jehovah isanandra, karaha Daniela?