Mwenye jwine jwa ku Babulo jwaliji Daliyo M’medi. Daliyo jwam’wonaga Daniyele kuŵa mundu jwapajika. M’yoyo ŵam’ŵisile kuŵa jwakwalolela acakulungwa ŵakusosekwa mnope m’cilambomo. Nambo acakulungwaŵa ŵamtendelaga jelasi Daniyele mwamti ŵasakaga kum’wulaga. Jemanjaji ŵamanyililaga kuti Daniyele jwapopelaga kwa Yehofa katatu palisiku. M’yoyo ŵapite kwa mwenye ni kwasalila kuti, ‘Mwenye, akusosekwa atamilikasye lilamusi lyakuti mundu jwalijose ŵalambileje wawojope. Jwalijose jwangapikanila lilamusili akusosekwa kumponya mwisimbo lya masimba.’ Daliyo ŵakamulene ni yeleyi, mwamti ŵasayinile lilamusili.

Daniyele paŵagambile kupikana yakwamba lilamusi lyasambanoli, jwapite kunyumba jakwe. Jwalakwe jwajinjile m’nyumba ni jwatindiŵele ciŵandika ni liwindo lyalyaliji lyewugule ni kupopelaga kwa Yehofa. Mwakusisimucisya, ŵandu ŵa jelasi ŵala ŵagambile kwinjila m’nyumbamo ni ŵamsimanile Daniyele ali mkupopela. Jemanjajo ŵawutucile kwa Daliyo ni ŵamsalile kuti, ‘Daniyele akasile lilamusi lyawo. Jwalakwe akusapopela kwa Mlungu jwakwe katatu palisiku lililyose.’ Daliyo ŵamnonyelaga Daniyele soni nganasaka kuti awe. Kwalisiku lyosope ŵalinjilelinjile kupata litala lyakuti amkulupusye Daniyele. Nambo mwenyewo ngamkanapakombola kucenga lilamusi lyaŵasayinile. Ŵasosekwaga kwalamula acalume kuti amponye Daniyele mwisimbo lya masimba gakogoya mnope.

 Nambo cilo ca lisiku lyelelyo, Daliyo nganapata lugono ligongo ŵadandawulaga mnope ni yayamtendecele Daniyele. Kundaŵi kwakwe, mwenyejo jwawutucile kulyaliji lisimbo kula ni jwagumisile kwa Daniyele kuti, ‘Ana Mlungu jwenu amkulupwisye?’

Kaneko Daliyo jwapikene maloŵe. Maloŵega galiji ga Daniyele. Ni jwalakwe jwagumisile kwa Daliyo kuti, ‘Lilayika lya Yehofa lyawugele pakamwa pa masimba, mwamti nganigambulaga.’ Daliyo jwasangalele mnope, mwamti jwalamwile ŵandu kuti amkoposye Daniyele mwisimbo mula. Daniyele nganakola liŵanga atamose limo. M’yoyo mwenye ŵala ŵalamwile kuti, ‘Ŵaponye mwisimbo acalume ŵaŵamjimbaga magambo Daniyele.’ Paŵagambile kwaponya mwisimbomo, masimba gala gakwakulangene acalumewo.

M’yoyo Daliyo jwalamwile kuti, ‘Jwalijose akusosekwa amjogopeje Mlungu jwa Daniyele, ligongo amkulupwisye Daniyele ku masimba.’

Ana mmwejo mkusapopelaga kwa Yehofa lisiku lililyose mpela muŵatendelaga Daniyele?