Uláakʼ rey anchaj Babiloniaeʼ, tiʼ u taal tu luʼumil Mediaeʼ, u kʼaabaʼeʼ Darío. Letiʼeʼ tu tsʼáaj cuenta jach yaan u naʼat Daniel, le oʼolal tu tsʼáaj u nuʼukt le máaxoʼob maas kʼaj óolaʼanoʼob teʼ luʼumiloʼ. Le máakoʼobaʼ u pʼekmoʼob kaʼach Daniel, le oʼolal taakchaj u kíimskoʼob. Letiʼobeʼ u yojloʼob Danieleʼ suuk u orar óoxtéen junpʼéel kʼiin, le oʼolal tu yaʼaloʼob tiʼ Darío: ‹Yuum rey, unaj u beetaʼal junpʼéel ley ka u yaʼal tuláakal máakeʼ unaj u orar chéen tiʼ teech. Wa yaan máax maʼ tu beetik le baʼax ku yaʼalik le leyoʼ, unaj u puʼulul teʼ sajkab tuʼux yaan le leonoʼoboʼ›. Daríoeʼ maʼalob tu yuʼubil le oʼolal tu firmartaj le leyoʼ.

Ka tu yojéeltaj Daniel le ley tsʼaʼabaʼ bin tu yotoch. Ka kʼucheʼ xolaj aktáan tiʼ junpʼéel ventana jeʼekʼabtaʼaneʼ ka orarnaj tiʼ Jéeoba. Le máaxoʼob pʼekmil Danieloʼ jáan ookoʼob teʼ najoʼ ka tu yiloʼob táan u orar. Ka binoʼob áalkabil u yaʼaloʼob tiʼ Darío: ‹Danieleʼ maʼ táan u beetik baʼax ta waʼaliʼ. Sáamsamaleʼ óoxtéen ku orar tiʼ u Dios›. Tiʼ Daríoeʼ ku lúubul utsil kaʼach Daniel, le oʼolal maʼ u kʼáat ka kíimsaʼakiʼ. Bul kʼiin táan u tuklik bix jeʼel u salvartik Danieleʼ, chéen baʼaleʼ mix letiʼ jeʼel u páajtal u luʼsik kaʼach le ley tsʼoʼok u firmartikoʼ. Le oʼolal anchaj u yaʼalik ka puʼuluk Daniel teʼ sajkab tuʼux yaan le leonoʼoboʼ.

 Teʼ áakʼab jeʼeloʼ, Daríoeʼ maʼ páajchaj u weenliʼ tumen táan u sen tuklik baʼax jeʼel u yúuchul tiʼ Danieleʼ. Ka sáaschajeʼ bin áalkabil teʼ tuʼux yaan le sajkaboʼ, chʼeenebnajeʼ ka tu kʼaʼam aʼalaj: ‹¡Daniel! ¿Tu salvartech wa a Dios?›.

Daniel túuneʼ tu núukajtiʼ: ‹U ángel Jéeoba nupʼ u chiʼ le leonoʼob utiaʼal maʼ u beetkoʼobten looboʼ›. Daríoeʼ sen kiʼimakchaj u yóoleʼ ka tu beetaj u jóoʼsaʼal Daniel teʼ sajkaboʼ. Ka jóoʼsaʼabeʼ ilaʼab jach mix baʼal uchaʼantiʼ. Ka tsʼoʼokeʼ le reyoʼ tu yaʼalaj: ‹Puleʼex teʼ sajkab le máaxoʼob tak u pool Danieloʼ›. Ka puʼuloʼobeʼ tu séebaʼanil jaantaʼaboʼob tumen le leonoʼoboʼ.

Daríoeʼ tu yaʼalaj tiʼ tuláakal le kaajoʼ: ‹Tuláakleʼex unaj a weʼeskeʼex tsiikil tiʼ u Dios Daniel. Letiʼ salvart tiʼ le leonoʼoboʼ›.

Techeʼ, ¿ka orar wa tiʼ Dios sáamsamal jeʼex tu beetil Danieloʼ?