Sti rey ni biʼniʼ mandar Babilonia nga ti hombre de guidxi Media láʼ Darío. Bidiibe cuenta jma nuu xpiaaniʼ Daniel que xcaadxi hombre, ngue runi gulí rey riʼ laabe para gácabe xaíque stiʼ ca hombre jma risaca de guidxi que. Gupa ca hombre riʼ envidia Daniel ne biyúbicaʼ modo guuticaʼ laabe. Gúnnacabe runi orar Daniel Jiobá chonna biaje lu ti dxi, ngue runi gúdxicabe Darío: «Rey, naquiiñeʼ chuʼ ti ley ni guiníʼ lii si nga naquiiñeʼ guni orar guiráʼ binni. Ne tu qué guni ni ná ley ca la? gusábacabe laa ndaaniʼ bizé ra nuu ca lión ca». Biiyaʼ Darío biaʼsi ngue ni ná ca hombre que ne biʼniʼ firmar ley que.

Ora gunna Daniel nuu ti ley cubi, guyé ra lidxi. Ne ora yendabe, bizuxíbibe ne biʼniʼ orarbe Jiobá ra ti ventana ni zuxeleʼ. Yechuu ca hombre que ra lídxibe ne biiyacaʼ cayuni orarbe. Oraqueca yetídxicabe Darío: «Cadi cuzuubaʼ Daniel stiidxaluʼ. Chonna biaje runi orarbe Dios stibe lu ti dxi». Cumu nachaʼhuiʼ Daniel la? qué niná Darío ñuuticabe laabe. Guidubi dxi que guníʼ íquebe xi gúnibe para gulabe Daniel. Peru qué zanda guchaabe ti ley ni maʼ biʼniʼ firmarbe. Ngue runi maʼ qué ñanda ñúnibe gastiʼ ne biʼniʼ mandarbe gusábacabe Daniel ndaaniʼ bizé ra nuu ca lión que.

 Qué ñanda ñasi Darío gueelaʼ que, tantu nuu xizaa pur Daniel. Casi birá gueelaʼ sti dxi que, ziguxooñebe ra bizé que ne ora bidxíñabe bicaabe ti ridxi: «¡Daniel! ¿Bilá Dios stiluʼ lii la?».

Binadiaga Darío ti ridxi. Daniel ngue bicabi laabe: «Ángel stiʼ Jiobá nga biseeguʼ ruaa ca lión ca, ne qué ñúnicame naa gastiʼ». Biecheʼ Darío gastiʼ qué ñaca Daniel ne biʼniʼ mandarbe cueecabe laa de raqué. Nin ti xhuga qué nuzaa ca lión que ladi Daniel. Despué biʼniʼ mandar rey que: «¡Lagusaba ca hombre ni guníʼ mal de Daniel ndaaniʼ bizé ca!». Ora bisábacabe ca hombre que, nagueendaca gudó ca lión que laacaʼ.

Bidii Darío mandatu riʼ guidxi que: «Guiráʼ binni naquiiñeʼ guni respetar Dios stiʼ Daniel. Purtiʼ laabe bilabe Daniel para cadi ñó ca lión que laa».

¿Lii yaʼ? ¿Laaca runi orarluʼ Jiobá guiráʼ dxi cásica biʼniʼ Daniel la?