Gu kura bakindo Babera angia Darayawesa. Darayawesa abi gupai nga Daniere kia. Ko amoi Daniere kurii gu nyanyakipa aboro dũ naadu rogo ringara. Agi akumba re aakpi Daniere akpi na i ki idi ka imoko. I aima ino gupai nga Daniere anakpara fu Yekova bara biata rogo aˈuru dũ, si du i ki ya fu Darayawesa: ‘Ako Bakindo, si naida ndiko duho nayugo gupai nga si naida aboro dunduko kpari fu kina ro sa. Gu boro ka basa gi ndiko re i ki ba ni ku rogo sima abahu yo.’ Rago angba ti Darayawesa na gi ndiko re ko ki moi fuo beko ti ni.

Nibasa fuo Daniere gipa gi vovo ndiko re, ko andu ku kpuko yo. Ko akuku pati bangiri bambu na ki kpari fu Yekova. Gi zingizingi akumba re andu ki rimi ku dimo kpuko yo ki gbiako ko ni kpari. I aoro koyo du Darayawesa ni na ki ya: ‘Daniere nabasa ro. Ko nakpara fu gako Mbori bara biata rogo uru sa.’ Darayawesa aima kpi nyemu Daniere ka ko aidanga ko kpi ya. Rogo gu uru re naabaha ko aaberãpa wai rengbe ko ka batasa Daniere. Ono zavura bakindo ni tini, ka ni arianga gu ndiko ni namoi fuo beni ti ni te. Ko aya fu gako aboro wẽ, i ba Daniere ku rogo sima abahu nga agura rindi ra adu kina ku zagi tipa ka sipo boro.

 Rogo gu yuru re, Darayawesa abakibangiriko ni kerehe tipa Daniere ka ko aranga ya. Ho rago agiri ni, ko aoro ku sima abahu yo na ki ya fu Daniere: ‘Ga Mbori banda ro?’

Darayawesa ki gi fugo boro koyo. Daniere du naadu! Ko ki ya fu Darayawesa: ‘Yekova nikedi maraika ko ki kisi ngba abahu. Ami amanganga re gbegberẽ kandara tooni te.’ Darayawesa adu na bakere ngbarago! Ko ki ya i kusi Daniere due yo kusayo. Sirõ ho kandara sa naadu ti kpoto Daniere te. Fuani bakindo ki zinahe nga: ‘Oni ba agu akumba ni kitingbanga Daniere ku due yo.’ Ho i aba agu akumba re ni ku due yo, abahu asipi yo kusayo ki riti yo.

Darayawesa ki rũ ndiko fu gako aboro nga: ‘Aboro dunduko gunde ti ga Daniere Mbori. Ko batasi Daniere be abahu.’

Ya mo mo naakpara fu Yekova dedede wa Daniere?