Stoib buñ ni buny mandary Babilonia góc laa Darío el medo. Bibiʼbu que Daniel diti nacbu xomod stipnés buñ, por ngú bixelbu Daniel gony mandary a guirá buñxirop ni goyoʼ lainy gudxcú. Guirá buñreʼ bianladxyibu Daniel né biyopyibu mod nagaityibu Daniel. Gonyibu que Daniel raniné Jehová tzón buelt ló tipdzú por ngú gochyibu Darío: «Rey, non tzoʼ toib ley ni guiniʼ que guiráxadit buñ nosi guinab lólo. Né ni diti ná guisob, non tzeebu lainy xcarió betz». Darío bioladx ni goniʼ guirá buñcu né bunybu firma láani.

Órni gon Daniel ni ná ley copycu, seecabu lidxbu. Órni bidxinbu lidxbu bixixipbu né goninébu Jehová nisló toib bentan ni xobial. Tisintiempsi buñ ni rianladx láabu bidxin lidxbu né bibiʼyibu que Daniel caniné Jehová. Gooygudxcayibu Darío: «Daniel diti casob ni goniʼlo. Tzón buelt raninébu Dios xtunybu ló tipdzú». Darío diti goniiny nagaitybu Daniel portín bibiʼbu que Daniel góc toib galán buñ. Guidopynac dzúcu bunybu pensary ximod nalaabu Daniel, per diti labúu bitzaʼbu ni ná guiich ni ma bunybu firma. Por ngú, bixelbu buñ nasal Daniel lainy xcarió betz.

 Guidopynac gueʼelcu diti gonás bacaʼal Darío portín goyoʼbu galrrasaʼ por Daniel. Stoib dzúcu pénsa cayonisusien, bixonybu goyeebu roʼ bileʼcu né bicaʼbu rudx scareʼ: «¡Daniel! ¿Bilaa Dios xtunylo looy la?».

Daniel cuapy láabu scareʼ: «Ángel xtuny Jehová bisieg roʼ guirá betz reʼ né diti noʼ xi bunyimu naʼ». Darío nigolú bibaladx né bixelbu buñ nabeʼyibu Daniel lainy bileʼcu. Goleʼyibu Daniel né diti noʼ xi gócbu. Después Darío buny mandary: «¡Colcoʼ guirá buñ ni bigotz falz a Daniel lainy xcarió bez!». Órni bisalyibu guirá buñcu, órcuca godó guirá betzcu layibu.

Darío gochbu guirá buñ de Babilonia: «Guirácato non gapto respet Dios xtuny Daniel. Portín láabu bilaabu Daniel».

¿Looy ga? ¿Láaca raninélo Jehová guirá dzú xomod Daniel la?