Ester ubino Nyayahudi m’ubed ukwo i Cucan i ng’om mi Perse. Oro ma dupa i wang’e, Nebukadnezar ugam ucoko jupagi kud i Yerusalem. Mordekai ma jatic pa Ahasuerus m’ubimo mi Perse re m’utunge. Ester ubino nyaku p’umin won Mordekai.

Ubimo Ahasuerus umito egam dhaker mange. E jutic pare gikelo mon ma beco mi ng’om pare i bang’e, i kindgi ubino bende Ester. I kind jumamon maeno ceke, ubimo ugam ung’io Ester kara ebed ni dhaker. Mordekai uwacu ni Ester nia kud etuci nia etie Nyayahudi.

Jakuhaya moko ma nyinge Haman re m’ubino jatelwic mi judongo ceke. Ebed emito dhanu ceke urum i wang’e. Mordekai ukwero nirum i wang’e, e kwinyo umaku Haman uketho emito enege. Kinde ma Haman unyang’ nia Mordekai utie Jayahudi, epangu lembe kara juneg Juyahudi ceke kud i ng’ombuca. E eyero ni ubimo kumae: ‘Juyahudi gitie dhanu ma reco, kwayu ineggi cen.’ Ahasuerus uyero ire kumae: ‘Tim gin m’ibemito timo,’ man emio ire copo mi wodho cik. Haman uwodho cik m’ukwayu nia dhanu gineg Juyahudi ceke i nindo 13 mi dwi mir Adar. Yehova ubino neno lembuno.

Ester ung’eyo ngo pi cik maeno. E Mordekai uoro ire cikne man ewacu ire kumae: ‘Cidhi iyer ni ubimo.’ Ester udwoko kumae: ‘Tek ng’atu moko umondo i bang’ ubimo ma julwong’e ngo, junege cen. Ubimo ulwong’a ngo udoko ceng’ 30! Ento abicidho. Tek eting’o uluthker pare, jubinega ngo. Ento tek eting’o ngo, jubinega.’

Ester ugam ucidho i lelagang’ p’ubimo. Kinde m’ubimo nene, egam eting’o uluthker pare ire. Ester ubino i bang’e man ubimo upenje kumae:  ‘Ester, iyenyo atim iri ang’o?’ Edwoko ire kumae: ‘Amito alwong’wu wukud Haman ni cemo moko.’ Kinde ma gini i dhu cam, Ester ulwong’ogi kendo ni cemo wang’ mir arionde. Kinde ma gibino i dhu cemo mir arionde, ubimo upenje kendo kumae: ‘Iyenyo atim iri ang’o?’ Edwoko ire kumae: ‘Ng’atu moko umito enega man thek mwa zoo. Timba bodhwa.’ Ubimo upenje kumae: ‘Ng’a m’umito enegi?’ Edwoko kumae: ‘Ng’atu maeni ma rac ma Haman.’ Kwinyo ulund umaku ubimo magwei man eketho junego Haman cen.

Ento ng’atu moko mbe ma copo loko cik ma Haman uwodho, kadok ebed ubimo. Pieno, ubimo uketho Mordekai udoko jatelwic mi judongo man emio ire copo mi wodho cik mange ma nyen. E Mordekai uwodho cik m’ukonyo Juyahudi nicero bang’gi gigi tekene jubemito negogi. I nindo 13 mi dwi mir Adar, Juyahudi givoyo judegi migi. Niai nindo maeca, gibed gitimo foc mir alocine kubang’ oro.