Esterajj judía tawaqönwa, Persia oraqen Susa sat markanwa jakäna. Familiaparojja Nabucodonosor reyiw Jerusalén markat walja maranak nayrajj apäna. Juparojj Mardoqueo primopaw uywasïna. Mardoqueojj Persia markan Asuero reyin serviripänwa.

Asuero reyejj machaq reina munäna. Ukatwa servirinakapajj markan utjkäna uka suma uñnaqtʼani warminak reyin ukar irpapjjäna, Ester tawaqorus irpapjjarakïnwa. Taqe uka warminak taypitjja, reyejj Esteraruw reinäñapatak ajllïna. Mardoqueojj ‘janipuniw khitirus judiätam arsütati’ sasaw Esterar sarakïna.

Uka markanjja jachʼa jachʼa tukuri Hamán sat mä jaqew utjäna, jupajj taqe jilïr jaqenakan jefepänwa. Taqeni jupa nayraqatan altʼasipjjaspa ukwa munäna. Ukampis Mardoqueojj janiw uk lurañ munkänti. Ukatwa Hamán chachajj wal jupatak coleräna, jiwayañ munarakïna. Mardoqueon judiötap yatisajj taqe judionakar jiwarayañ amtäna. Reyirojj sarakïnwa: ‘Judionakajj jan walinwa uñjasiyistaspa, jiwarayañaw wakisispa’ sasa. Asuero reyejj sänwa: ‘Kunatï jumatakejj waljamäki uk luraskakim’ sasa. Mä ley apsuñapatakiw permiso churarakïna. Uka leyinjja, ‘13 de adar urunwa taqe judionakar jiwarayasiñapa’ sasaw säna. Taqe ukanakjja Jehová Diosajj sum uñjaskäna.

Esterajj janiw uka leyit yatkänti. Ukatwa Mardoqueojj mä copia akham sasin apayäna: ‘Reyimpi parlir saram’ sasa. Esterajj sänwa: ‘Jan jawsatäkas reyin ukar saririrojj jiwayapjjewa. Reyejj 30 urunakaw jan jawsjjetuti. Ukampis saräwa. Reyitï thujrup naya toqer aytaninejj jakaskäwa, jan ukhamäkanejj jiwayapjjetaniwa’ sasa.

Esterajj reyin ukar saräna ukhajja, reyejj Ester toqeruw thujrup aytäna. Ester reinajj jakʼachasïna ukhajja, reyejj akham jisktʼäna: ‘Ester, ¿kunsa munta?’ sasa. Esterajj sänwa: ‘Nayajj manqʼasiñatakiw jumampir  Hamán chachampir invitañ munapjjsma’ sasa. Ukar sarapjjäna ukhajja, yaqha manqʼäwiruw Esterajj invittʼarakïna. Ukanjja wasitampiw reyejj ‘Ester, ¿kunsa munta?’ sasin jisktʼäna. Esterajj sänwa: ‘Mä jaqew nayampiru markajampiru jiwarayañ munapjjetu. Mirä amp suma, salvapjjetaya’ sasa. Reyisti sarakïnwa: ‘¿Khitis jiwayañ muntam?’ sasa. Reinasti sarakïnwa: ‘Aka jan wali Hamán jaqew jiwayañ munapjjetu’ sasa. Asuero reyejj wal colerasïna, ukaratpachaw Hamán chachar jiwayapjjañapatak mayirakïna.

Hamán chachajj ley apskäna ukjja, janiw reyis chhaqtaykaspänti. Ukatwa reyejj Mardoqueo chachar jilïr jaqenakan jefepat uttʼayäna, juparojj yaqha ley apsuñapatakiw permiso churarakïna. Uka machaq leyirjamajja, jiwayañ munatajj judionakajj saytʼasipjjañapänwa. 13 de adar urunjja, judionakajj enemigonakapar atipapjjänwa. Sapa maraw ukham atipapjjatap amtapjjerïna.