Ester a bé ngond Lôk Yuda i i bé niñ i nkoñ Persia le Susan. Hala a bé ngandak nwii le Nébukadnézar a bi héya lihaa jé i Yérusalem. Maasañ le Mardôkai, nu a bé sal i ndap Kiñe Ahasuérus i Persia, nyen a bi néñés nye.

Kiñe Ahasuérus a bééna ngôñ ni nwaa mondo. Bagwélél bé ba lona nye bingond bi nkoñ wé wonsôna, bi bi bé lôôha ni bilama, yak Ester a bé mu. Ikété bôda ba bobasôna, Ester nyen kiñe a bi tep inyu ba kiñe muda. Mardôkai a béhe Ester le a kalak bañ le a yé ngond Lôk Yuda.

Mut ngôk wada le Haman a bé ñane dikoo di mbok tjodisôna. A bé gwés le bôt bobasôna ba ôôp bisu gwé. Mardôkai a bé tjél boñ hala, Haman a unup ngandak, a kahal yéñ njel i nol nye. Kiki Haman a bi yi le Mardôkai a bé man Lôk Yuda, a ôô jimb inyu nol bon ba Lôk Yuda bobasôna. A kal kiñe le: ‘Bon ba Lôk Yuda ba yé bibéba bi bôt; nol bo.’ Ahasuérus a timbhe le: ‘Boñ yom yosôna u ngwés,’ a ti ki nye kunde le a tila mbén. Mbén Haman a bi tila i bé kal le ba nol bon ba Lôk Yuda bobasôna i hilo 13 hi sôñ Adar. Yéhôva a bé tehe mam ma.

Ester a bé yi bé le i nya mbén i, i bi tilba. Jon Mardôkai a bi ômle nye yo, a kal nye le: ‘Ke pôdôs kiñe.’ Ester a timbhe le: ‘Tonjee a njôp yak kiñe le a nsébla bé a nlama nôla. Hala a yé 30 ma dilo len le kiñe i nsébél bé me! Ndi me ga kee. Ibale a nand jai jé li mbok, me ga niñ. Ibale hala bé, me ga wo.’

Ngéda Ester a bi telep i kotoo ndap kiñe, kiñe i tehe nye, i nand nye jai jé li mbok. A ke nye bisu, kiñe i bat nye le: ‘Kii me nla bôñôl we, a Ester?’  A timbhe nye le: ‘Me gwé ngôñ i naña we ni Haman i je.’ Kiki ba bé je, Ester a témb a naña bo je hilo hipe. I kel i nyen kiñe i tiimba bat Ester le: ‘Kii me nla bôñôl we?’ Ester a timbhe le: ‘Ngim mut i nsômbôl nol me ni litén jem. Soho, sôñ bés.’ Kiñe i bat le: ‘Njee a ngwés nol we?’ A timbhe le: ‘I béba mut ini le Haman.’ Kiñe Ahasuérus a unup ngandak, kayéle a bi nol Haman mu manut ma bé noñ ha.

Mut nye ki nye a bé bé a la bôk mbén i Haman, to kiñe yomede. Jon kiñe i bi téé Mardôkai i ngi dikoo di mbok, i ti ki nye kunde i téé mbén mondo. Mardôkai a téé ngim mbén i i bé ti Lôk Yuda kunde i jo sañ ni i sôñ niñ yap. Hilo 13 hi sôñ Adar, Lôk Yuda i bi bép baoo bap. Ibôdôl yokel, ba bi téé ngand i ba bé tégbaha hiki nwii.