Adong ma sahalak borua Jahudi na tinggal di kota Susan na di Persia. Piga-piga taon naung salpu, diboan si Nebukadnesar do keluargana sian Jerusalem. Anak ni bapatuana do na pabalga-balgahon ibana, i ma si Mordahai. Sahalak pangurupi do si Mordahai di istana ni raja Persia, i ma Raja Serses.

Di sada tingki, naeng dipillit Raja Serses ma ratu na baru. Disuru ibana ma asa diboan sude borua na bagak. Termasuk ma i si Ester. Sian sude borua i, si Ester ma na dipillit gabe ratu. Alai didok si Mordahai do asa unang dipaboa si Ester na halak Jahudi ibana.

Adong ma sahalak baoa na ginjang rohana, na margoar si Haman. Ibana do na mengawasi angka pejabat. Disuru ibana do asa marsomba sude halak tu ibana. Alai ndang olo si Mordahai. Gabe muruk ma si Haman jala naeng dipamate ma si Mordahai. Dung diboto ibana na halak Jahudi si Mordahai, naeng dipamate ma sude halak Jahudi na di Persia. Didok ma tu raja, ‘Jahat do halak Jahudi i. Ingkon pamateonmu do nasida.’ Didok si Serses ma, ‘Lomom ma bahen.’ Dung i diloas raja ma si Haman mambahen peraturan asa dibunu sude halak Jahudi di tanggal 13 Adar (ujung ni bulan dua sahat tu mula ni bulan tolu). Alai, diida Jahowa do i.

Ndang diboto si Ester peraturan i. Alani i, dipaboa si Mordahai ma i tu ibana, didok ma, ‘Mangkatai ma ho tu raja.’ Didok si Ester ma, ‘Dipamate do na manjumpangi raja molo ndang dijou. Nunga 30 ari ahu ndang dijou raja! Alai laho pe ahu. Molo dibahen raja tungkotna tu ahu, malua ma ahu. Molo ndang, mate ma ahu.’

Dung i laho ma si Ester tu istana ni raja. Tingki diida raja ibana, dibahen ma tungkotna tu si Ester. Didapothon si Ester ma raja i. Disungkun raja ma, ‘Aha na porlu  Ester?’ Didok si Ester ma, ‘Ro ma ho dohot si Haman tu pesta na hubahen.’ Di pesta i, didok si Ester ma muse asa ro nasida tu pesta na laho dibahen marsogotna i. Dung ro nasida, disungkun raja ma, ‘Aha do na porlu Ester?’ Didok si Ester ma, ‘Tolong ma jo ahu. Adong na laho pamatehon ahu dohot bangsongku.’ Didok raja ma, ‘Ise na laho pamatehon ho?’ Didok si Ester ma, ‘Si Haman na jahat on.’ Gabe muruk ma raja i jala disuru ma asa dipamate si Haman.

Alai ingkon diulahon do peraturan naung dibahen si Haman i. Raja pe ndang boi mangorai. Alani i, dibahen raja ma si Mordahai gabe pengawas ni angka pejabat jala diloas ma ibana mambahen peraturan na baru. Dibahen si Mordahai ma peraturan na mandok, boi do halak Jahudi mangalo musu molo naeng dipamate. Di tanggal 13 bulan Adar, ditaluhon halak Jahudi ma musu ni nasida. Mulai sian i, dirayahon nasida ma i ganup taon.