Ester iso binkbor Yahudi ḇeḇarek ro mnu Syusyan ḇero Persia. Mordekai, Ester ḇeba ḇyedi, iso ḇefaduru Ester i. Mordekai ḇye manfamyan faro Ahasweros Raja Persia.

Raja Ahasweros imbe syewar ratu ḇebabo ḇe i. Manfamyan ḇyesi sun bin ḇepduk ḇero Karajan ani sya, Ester i kako. Ro bin syakame, raja kyinfir Ester i ḇe ratu. Mura Mordekai ikofen ḇe i sedo fyawar awer snar ima bin Yahudi dirya.

Snon ḇeararer oso snori Haman iso ḇepoik faro ḇebarara syakam. Imarisen snonkaku syakam sikunem faro i. Ḇape, Mordekai imewer ifrur rarirya, inja Haman imsor kaku ma imbe myun Mordekai. Rofyor Haman ifawi Mordekai ima snonkaku Yahudi dirya, ifrur aw ḇyena fa myun snonkaku Yahudi syakam ḇero Karajan ani. Ikofen ḇe Raja, ’Snonkaku Yahudi sima siḇyeḇa kaku. Fandun fa mun pres si.’ Raja Ahasweros doḇe, ’Wafrur mura rosai wamarisen na.’ Mura Raja ḇyuk papoik ḇe i fa ifrur sasoser oso. Haman ifrur sasoser ḇewan kawasa sya fa smun snonkaku Yahudi syakam ro ras ḇeḇe 13 paik Adar. Yahwe isya myam roi ifrur nane.

Ester ifawi roi ḇekur sasoser ani ḇa. Inja Mordekai fyarem sasoser ani ḇe i ma danun, ’Wawospyan ḇe Raja i.’ Ester doḇe, ’Snonkaku ḇesrow Raja mboi dor i ḇa ido nari smun i. Ras ri 30 kwar Raja dor aya ḇa! Ḇape, nari yarama fa yasrow kuker i. Fyor isu ankyon ḇyedi muma ḇe aya ido, nari yakenem pdef. Oroḇa ido, nari yamar.’

Ester ryaḇe istana bubes ya. Rofyor Raja myam i, isu ankyon ḇyedi mufa ḇe i. Ester fyanam ḇe i ma Raja ifuken, ’Ester rosai imbe wakofen ya?’ Kyarem, ’Yaḇe  yor Raja au ma Haman fa murama ro munara yafrur na.’ Ro munara ani, Ester dor su wer fa surama ḇe munara ḇesuru ya, na ifrur ro meser ya. Fafisu munara ḇesuru ya imbrane, Raja ifuken wer, ’Rosai imbe wakofen ya?’ Ester doḇe, ’Oso isya iḇe myun aya ma er ayansya. Yor kaku fa faspar inko.’ Raja ifuken, ’Mansei imbe ḇemun au i?’ Ester kyarem, ’Snonkaku ḇeḇarḇor ani iso Haman i.’ Ahasweros imsor fafayaḇa ma iwan insama smunbos Haman i.

Ḇape, snonkaku oso ḇaberi ipok idwarek sasoser Haman ifrurna ḇa, Raja mankundi kako. Inja, Raja ḇye Mordekai i fa ḇye manḇepoik faro ḇebarara sya ma ḇyuk papoik ḇe i fa ifrur sasoser ḇebabo. Mordekai ifrur sasoser ḇewan snonkaku Yahudi sya insa sikadaunwarek mankunsi fyor mbroḇ sesya siḇe smun si. Ro ras ḇeḇe 13 paik Adar, snonkaku Yahudi sikafyo mbroḇ sesya. Ro fyor ya ḇebo, sifrur munara ro taun nakam fa sikswarepen payamyum sismai ani.