Lit sekalak singuda-nguda, gelarna Ester. Ia kalak Jahudi. Ia tading i kota Susan bas Persia. Sanga kalak Jerusalem itaban Nebukadnesar, keluarga Ester pe ikut. Ia ipegalang Mordekai, turangna sembuyak bapak. Mordekai ngelayani Raja Ahasweros, raja Persia.

Bas sada wari, idarami raja Ahasweros me ratuna si mbaru. Ibaba me kerina diberu-diberu si mejile ku lebe-lebe raja, salah sadana eme Ester. Arah kerina si nguda-nguda e, Ester me si terpilih. Nina Mordekai man Ester, ‘Ula kata-kataken kam kalak Jahudi ya.’

Lit sekalak dilaki si sombong kel. Ia kepala pejabat i bas kerajan e. Gelarna Haman. Atena min gelah kerina kalak nungkuk sanga ia mentas. Tapi, Mordekai la nggit nungkuk. Emaka, segat ate Haman man ia, janah ibunuhna atena ia. Sanga ieteh Haman maka si Mordekai e kalak Jahudi, ibanna me rencana guna munuh kerina kalak Jahudi si lit i negeri e. Nina man raja, ‘Erbahaya kel kalak Jahudi e, emaka arus ibunuhndu kalak e.’ Nina Ahasweros me, ‘Labo dalih adi e kin atendu.’ Emaka iberena kuasa man Haman guna erban aturen. Iban Haman me sada aturen, bas tanggal 13 bulan Adar kerina kalak Jahudi arus ibunuh. Kerina si terjadi e idah Jahwe nge.

Perban lenga ieteh Ester berita e, ikirim Mordekai me surat momo e man ia janah mindo ia man Ester, ‘Cakapkenlah kerna si e man raja.’ Nina Ester, ‘Adi kudahi raja padahal labo aku iundangna, banci kari aku ibunuhna. Enda pe nggo 30 wari aku la iundangna! Tapi labo dalih yah, kudahi kari raja. Mbera-mbera angkatna kari tongkatna gelah la aku ibunuh. Adi lang, surung me aku mate.’

Lawes me Ester ndahi raja. Sanga idah raja ia, iangkat raja me tongkatna. Emaka, ideheri Ester me raja. Nce, isungkun raja ia, ‘Kai ndai, Ester?’ Nina Ester, ‘Ras ateku kita man, ras Haman pe.’ Nce, sanga acara man-man e, iundangna sekali nari kalak e duana. Bas acara man-man si peduaken, isungkun raja ia, ‘Kai atendu, Ester?’ Ialoi Ester, ‘Lit atena si munuh aku ras bangsaku. Selamatken min kami, Raja.’ Raja e pe bingung, ‘Eh, ise si atena munuh kena?’ Mis ijawab Ester, ‘E kalakna deh, si Haman e.’ Merawa kel Ahasweros, janah mis atena bunuhna si Haman.

Aturen si iban Haman e la banci ibatalken ise pe bage pe raja. Jadi, iban raja me Mordekai jadi kepala pejabat janah iberena kuasa man ia guna erban aturen si mbaru. Iban Mordekai sada aturen maka kalak Jahudi banci mbela dirina adi iserang. Bas tanggal 13 bulan Adar e, talu me si nerang kalak Jahudi. Tiap tahun kenca si e, irayaken kalak Israel wari kemenangen e.