Si Ester maoy usa ka Hudiya nga nagpuyo sa siyudad sa Susan nga sakop sa Persia. Daghang tuig kanhi, gikuha ni Nabucodonosor ang pamilya ni Ester gikan sa Jerusalem. Giatiman siya sa iyang ig-agaw nga si Mardokeo, ang sulugoon sa hari sa Persia nga si Ahasuero.

Nangitag bag-ong rayna si Haring Ahasuero. Gipakita kaniya sa iyang mga sulugoon ang pinakaguwapa nga mga babaye sa ilang lugar, apil si Ester. Si Ester ang napili sa hari nga mahimong rayna. Giingnan ni Mardokeo si Ester nga dili magsaba nga Hudiya siya.

Ang hambogirong si Haman maoy lider sa tanang pangulo. Gusto niyang moyukbo niya ang tanang tawo. Pero wala moyukbo niya si Mardokeo maong nasuko kaayo siya ug gusto niyang patyon si Mardokeo. Dihang nahibaloan ni Haman nga Hudiyo si Mardokeo, nagplano siyang patyon ang tanang Hudiyo. Giingnan niya ang hari: ‘Daotan ang mga Hudiyo; kinahanglang patyon nimo sila.’ Mitubag si Ahasuero: ‘Buhata ang imong angayng buhaton,’ ug iyang gihatagan siyag awtoridad sa paghimog balaod. Ang balaod nga gihimo ni Haman nagsugo sa mga tawo nga patyon ang tanang Hudiyo sa ika-13 nga adlaw sa bulan sa Adar. Kining tanan nakita ni Jehova.

Wala mahibalo si Ester sa maong balaod. Busa gipadad-an siya ni Mardokeo ug kopya sa balaod ug giingnan: ‘Estoryaha ang hari.’ Si Ester miingon: ‘Patyon ang moadto sa hari nga wala ipatawag. Wala ko ipatawag sa hari sa 30 na ka adlaw! Pero moadto ko niya. Kon iyang itunol ang iyang setro, mabuhi ko. Pero kon dili, mamatay ko.’

Giadto ni Ester ang hari. Pagkakita sa hari, iyang gitunol kang Ester ang iyang setro. Miduol si Ester ug gipangutana siya sa hari: ‘Ester, unsay imong tuyo?’ Siya mitubag: ‘Gusto ka nakong imbitahon ug  si Haman sa salosalo.’ Samtang nagsalosalo sila, giimbitar na pod sila ni Ester ug laing salosalo. Sa ikaduhang salosalo, nangutana na sab ang hari: ‘Unsay akong ikaalagad nimo?’ Siya miingon: ‘Naay gustong mopatay nako ug sa akong katawhan. Palihog luwasa mi.’ Nangutana ang hari: ‘Kinsa may gustong mopatay nimo?’ Mitubag siya: ‘Kining daotang tawo nga si Haman.’ Puwerteng sukoa ni Ahasuero ug iya dayong gipapatay si Haman.

Pero bisan ang hari dili na makausab sa balaod nga gihimo ni Haman. Busa gihimo sa hari nga lider sa mga pangulo si Mardokeo ug gihatagan siyag awtoridad nga maghimog bag-ong balaod. Naghimog balaod si Mardokeo nga puwede nang depensahan sa mga Hudiyo ang ilang kaugalingon kon atakehon sila. Sa ika-13 nga adlaw sa bulan sa Adar, gipildi sa mga Hudiyo ang ilang mga kaaway. Sukad niadto, kada tuig nilang gisaulog ang maong kadaogan.