Bon te teinnaine ae te I-Iutaia Etita ao e maeka ni kaawani Botia ae Tiutian. A kairakinako mai Ierutarem ana utu neiei iroun Nebukaneta i nanon ririki aika bati mai mwaina. E kaikawaaki iroun ai mwanena ae Moretekai, ae ana toro Aatueruti ae Ueani Botia.

E tangira te ueannaine ae boou te Uea ae Aatueruti, ao ana toro a kairiia nakoina aine aika taiani kabanea ni botonnaine n ikotaki ma Etita. E rineaki Etita iroun te uea bwa te ueannaine mai buakoia aine aikai. E tuangaki neiei irouni Moretekai bwa e na aki kaotia ae te I-Iutaia ngaia.

Bon te mataniwi i aoia tooka ni kabane Aman ae kainikatonga. E tangiria bwa a na bobaraaki nakoina aomata ni kabane. E rawa ni karaoa anne Moretekai ngaia are e rangi n un Aman ao e kan tiringnga. Ngke e a ataia Aman ae te I-Iutaia Moretekai, e a karaoa ana babaire ibukini kamaunaaia I-Iutaia ni kabane man te aba. E taku nakon te uea: ‘A kakamaaku I-Iutaia ngaia are ko riai ni kamaunaia.’ E taku Aatueruti: ‘Karaoa te bwai ane ko taku,’ ao e anganna te mwaaka bwa e na karaoa te tua. E karaoa te tua Aman ae a tuangaki iai aomata bwa a na tiringia I-Iutaia ni kabane n te ka-13 ni bong n te namwakaina ae Ata. E nora te bwai ae riki Iehova.

E aki ataa te tua aei Etita. Ngaia are e kanakoa katoton te tua Moretekai nakon neiei ao e tuangnga ni kangai: ‘Naako taetae nakon te uea.’ E taku Etita: ‘Ngkana iai ae e kawara te uea ao e aki kaoaki, e na bon tiringaki. E tuai mani kaoai i nanon 30 te bong! Ma N na bon nako. Ngkana e arora okona, N na boni maiu. Ma ngkana e aki, N na boni mate.’

Ao e nakon ana katawanang te uea Etita. Ao te uea ngke e nora neiei, e a arora naba okona. E keerake neiei nakoina ao e taku te uea: ‘Tera ae I kona ni karaoia ibukim Etita?’ E taku neiei: ‘I kani kaoko  ma Aman nakon au baka n amwarake.’ N tain te baka n amwarake ao e a manga kaoia riki naakai Etita nakon ana baka n amwarake are imwina. N te kauoua ni baka n amwarake ao e a manga titiraki naba te uea ni kangai: ‘Tera ae I kona ni karaoia ibukim?’ E taku neiei: ‘Iai ae e nang kamateai ma au aomata. Taiaoka ma kamaiuira.’ E titiraki te uea ni kangai: ‘Antai ae e kani kamateko?’ E taku neiei: ‘Te mwaane ae buakaka aei ae Aman.’ E rangi n un Aatueruti ao e a tua naba ngkekei kamatean Aman.

Ma akea ae e kona ni kamauna ana tua Aman ao e aki kona naba te uea. Ngaia are e a rinea Moretekai te uea bwa e na mataniwi i aoia tooka ao e anganna te mwaaka bwa e na karaoa te tua ae boou. E a karaoa te tua teuana Moretekai ibukini kariaiakaia I-Iutaia bwa a kona ni buaka ngkana a ekakinako. N te ka-13 ni bong n te namwakaina ae Ata ao a a tokanikai I-Iutaia i aoia taani kairiribai nakoia. Man te tai anne ao a kakauringa tokanikaia aei ni katoa ririki.