Eejatü wanee majayülü Ester sünülia kepiapuʼusü suluʼu wanee mma Susa münüsü. Kakaliaina amaanüin na süpüshikana Jerusalénjee nutuma Nabucodonosor. Epijünüsü shia nutuma wanee suwalaichi kanüliakai Mardoqueo, aʼyataashi nia nipialuʼu chi aluwataashikai Asuero.

Süka kaʼwayuuseein nüchikuaʼa Asuero, eʼikajünüsü nümüin tü jieyuu anasücheinkalüirua maʼin eejatka suluʼu tü mmakat, eejatü Ester naʼaka naya jieyuukana. Shia Ester nüneekaka chi aluwataashikai süpüla shiainjatüin nuʼwayuusein. Nüküjain Mardoqueo sümüin Ester nnojoluinjatüin süküjain judíoin shia.

Hamán nünülia wanee wayuu laülaashikai napüleerua na wayuu kojutukana maʼin. Yaleta aaʼinchi Hamán otta süsapainkeesü wayuu nümülatuʼu, nnojotpejeʼe naaʼinrüin tia Mardoqueo. Jashichika maʼin Hamán nümüin Mardoqueo jee nüchajaaka sukuwaʼipa süpüla nuʼutuinjachin naaʼin. Nütüjaapa saaʼu Hamán judíoin Mardoqueo, nukumajüin sukuwaʼipa süpüla nuʼutirüin naaʼin napüshuaʼa na judío kepiakana Susa. Nümaka Hamán nümüin Asuero: «Wayuu mojulaashii maʼin na judíokana, shia nepika noʼutunule aaʼin napüshuaʼa». Nusoutaka Asuero nümüin: «Paainja tü keeʼireekat paaʼin naka». Aapünüsü laülawaa nümüin süpüla nüikaleʼerüin wanee pütchi. Aküjünüsü suluʼu tia pütchikat, noʼutunuinjanain aaʼin na judíokana soʼu kaʼikat 13 soʼu kashika adar. Nütüjaapajaʼa aaʼu Jeʼwaa süpüshuaʼa tü kasa aainjünakat.

Nnojotsü sütüjaain aaʼu Ester tü kasa naaʼinreekat Hamán. Makalaka nuluwataain Mardoqueo wanee sukoopiain tü pütchi nüikaleʼerakat Hamán. «Paashajaa nümaa chi aluwataashikai», müshi Mardoqueo sümüin Ester. «Müleka sürütkaale wanee wayuu eere joyotuin chi aluwataaikai sümaa nnojoluin suunejuushin, outajatü shia. Eeirü maʼaka 30 kaʼi süchikijee nuunejüin taya chi aluwataaikai. Oʼuneerüjaʼa neʼe taya, müleka niyalerüle nuwaraaratse tanainmüin kateerü toʼu, müleka nnojorüle niyalerüin shia outeerü taya», sümaka Ester nümüin.

Suʼunaka Ester eere joyotuin chi aluwataashikai, niʼrapa shia, niyalerüin nuwaraaratse sünainmüin. Arütkaasü shia nünainmüin chi aluwataashikai otta nüsakirakalaka shia:  «¿Kasa keeʼireeka paaʼin Ester?». «Keeʼireesü taaʼin püntajachin nümaa Hamán sünain wanee ekawaa eeinjatka tatuma», sümaka nümüin. Wanaa sümaa nekaain, suunejaain Ester naya nachikuaʼa süpüla wanee ekawaa waneemüin kaʼi. Sünain tü chiiruaajatkat ekawaa, nümaka Asuero: «¿Kasa puchunteeka tamüin Esteetche?». «Eeshi wanee wayuu oʼuteeka taaʼin otta nuʼutee aaʼinchii na tapüshikana. Jalia maa waya nuulia aluwataashikalee», sümaka nümüin. Nusoutaka chi aluwataaikai: «¿Jaraikai maʼin chi wayuu oʼuteekai paaʼin?». «Shia wayuukat tüü, Hamánwaʼataka», sümaka Ester nümüin. Jashichishaatashi maʼin Asuero, makalaka nuʼutiramaatüin naaʼin Hamán.

Nnojotsü süpüla süwüinjaain tü pütchi nüikaleʼerakat Hamán, jaʼitakajaʼa chi aluwataashikai nnojotsü süpüla naaʼinrüin tia. Niʼitaanaka Mardoqueo nutuma chi aluwataashikai süpüla niainjachin laülaain napüleerua na wayuu kojutukana maʼin. Nuluwataaka nia süpüla nüikaleʼerüin wanee pütchi jeketü. Tia pütchikat, süpülajatü natkaain na judíokana namaa na oʼuteekana aaʼin naya. Nakanajüin na naʼünüükana soʼu kaʼikat 13 soʼu kashika adar. Soʼujeʼereʼeya kaʼikat tia, sotowaisü shia naaʼin juyawai.