Ester haʼe vaʼekue peteĩ kuñataĩ judía oikóva Pérsiape, peteĩ siuda héravape Susa. Nabucodonosor ogovernárõ guare ogueraha vaʼekue Ester hentekuérape Jerusaléngui. Estérpe omongakuaa vaʼekue peteĩ iprímo hérava Mardoqueo. Mardoqueo haʼe vaʼekue pe rréi Asuero Persiagua sirviénte.

Rréi Asuero oipota vaʼekue ótra rréina hembireko rekoviarã. Upévare isirvientekuéra ogueraha chupe umi kuñataĩ iporãvéva oĩva upe paíspe oiporavo hag̃ua, ha umíva apytépe ojegueraha avei Estérpe. Rréi Asuero olehi Estérpe la rreinarã. Mardoqueo heʼi Estérpe ani hag̃ua omombeʼu avavetépe haʼe judiaha.

Umi prínsipe oĩ vaʼekue Hamán kárgope. Hamán ningo oñemombaʼeguasueterei vaʼekue ha oipota enterove oñakãity henondépe, péro Mardoqueo ndojapói upéva. Hamán ipochyeterei upévare ha ojukase voi Mardoquéope. Upéi Hamán oikuaa Mardoqueo haʼeha judío ha oplanea peteĩ mbaʼe ojukapaite hag̃ua entéro umi judío oĩvape upe paíspe. Haʼe heʼi pe rréipe: “Umi judío ningo ñandeapeligra, jajukapa vaʼerã chupekuéra”. Ha Asuero heʼi chupe: “Ejapo katu oimérõ rehechakuaa tekotevẽha upéva”. Pe rréi omeʼẽ permíso Hamánpe onohẽ hag̃ua peteĩ léi. Ko léi heʼi pe día 13 del mes de adar ojejukapa vaʼerãha umi judíope. Péro Jehová ohechapaite hína kuri la oikóva.

Ester ndoikuaái kuri upe léi osẽ vaʼekue, upémarõ Mardoqueo oguerahauka chupe peteĩ kópia ha heʼika chupe oñeʼẽ hag̃ua pe rréi ndive. Ester heʼi chupe: “Oimeraẽ ohóva pe rréi rendápe haʼe ohenoiʼỹre chupe katuete ojejuka. Ha ojapóma ningo 30 día pe rréi nacherenoikavéi hague aha hag̃ua hendápe. Upéicharõ jepe aháta, ha haʼe ohupíramo ivastón de óro che renondépe, ajesalváta. Ha ndojapóiramo upéva katu amanótamante”.

Ester oho oike pe rréi palásio korapýpe ha pe rréi ohechávo chupe omopuʼã ivastón de óro Ester oĩha gotyo. Upémarõ Ester oñemboja pe rréi rendápe ha pe rréi  oporandu chupe: “¿Mbaʼéiko reikotevẽmi Ester?”. Ha Ester heʼi chupe: “Ajapóta hína peteĩ vankéte ha aipotaiterei reho Hamán ndive pekaru hag̃ua”. Upéi okaru jave hikuái, Ester heʼi pe rréipe ojapotaha ótro vankéte ha oinvita jey chupekuéra oho hag̃ua. Pe rréi oho jey upe vankétepe ha oporandu jey Estérpe mbaʼépa oikotevẽ. Upépe haʼe heʼi chupe: “Oĩ peteĩ chejukaséva chéve ha che puévlope. Oresalvamína por favór”. Pe rréi heʼi chupe: “¿Máva piko upe kuimbaʼe ndejukaséva?”. Ester heʼi chupe: “Ko kuimbaʼe Hamán hína la iñañaitéva orendive”. Asuero ipochyeterei ha ensegída voi omanda ojejuka hag̃ua Hamánpe.

Péro pe léi Hamán onohẽ vaʼekue ndaikatuvéima oñeanula, ni pe rréi ndaikatúi ojapo upéva. Upémarõ pe rréi omeʼẽ Mardoquéope pe puésto ijyvatetéva oreko vaʼekue Hamán ha omeʼẽ chupe permíso onohẽ hag̃ua peteĩ léi pyahu. Ko léi heʼi umi judío ikatuha oñedefende ojeataka vove chupekuéra. Pe día 13 del mes de adar, umi judío ogana kuri ikontrariokuérape. Upe guive káda áño umi judío ofesteha ogana hague.