Ester abokän meri judía nämene nüne juta Persia kädeka nämene Susa yekänti. Rei Nabucodonosor nikani niara mräkätre nämene Jerusalén ye ngwena ngite ye käi nikani kwati krubäte ta. Ngwaikrä Mardoqueo käkwe niara ngübabare, Mardoqueo nämene sribire rei Asuero käi Persia ye kräke.

Rei Asuero tö namani reina mrä ie. Aisete nitre sribikä kwe ye nikani meritre bäri bä nuäre jutate ye ngwena ie, meritre ye ngätäite Ester nämene siba. Meritre ye jökrä ngätäite reikwe Ester dianinkä rabakäre reina. Mardoqueo niebare Ester ie niara abokän judía ye ñaka niedre jire kwe.

Ni iti bikaka kri kädeka nämene Hamán abokän nämene nitre sribikä gobranbe ye jie ngwen. Nitre jökrä käkwe ja mikadrete kuintubu ie niara tö namani. Akwa Mardoqueo ñaka ja mikaninte kuintubu. Hamán namani rubun krubäte yebätä tö namani murie ketai. Mardoqueo ye abokän ni judío namani gare Hamán ie ye ngwane niara ja töi mikani nitre jökrä judío nämene juta yete ye murie kete. Niebare kwe rei ie: ‘Nitre judío ye töi blo krubäte. Niaratre ye jökrä murie ketadre’. Asuero niebare ie: ‘Dre tuin kwin mäi ye erere mäkwe nuain’. Aune Hamán tuanimetre kwe kukwe ükete keteiti. Kukwe ükaninte ye köbö 13 sö adar ye ngwane nitre rabadre nitre judío jökrä ye murie kete. Akwa dre nämene nemen bare ye jökrä nämene tuin Jehovai.

Kukwe ükaninte ye ñaka nämene gare Ester ie. Yebätä Mardoqueo kukwe ye juani ie aune niebare kwe ie: ‘Mäkwe blita rei ben’. Ester niebare ie: ‘Rei ñaka nire nübaire jakänti ye rabadre niara känti angwane murie ketata. Aune köbö nikanina 30 ta yete rei ñaka ti nübaire jire jakänti. Akwa ti näin. Krimana kaikä ti ngäbiti kwe angwane ti täi nire. Akwa ye erere ñaka rabai bare angwane ti murie ketai’.

Ester namani jubäre ju gobrankäre reikwe yekänti. Niara jutuabare rei ie angwane, krimana kaninkä kwe niara ngäbiti. Ester rökrabare ken aune rei ngwantaribare ie: ‘¿Ester mä tö drei?’. Niara niebare rei ie: ‘Mä  aune Hamán ti tönibi tuai niken jakänti mrö sribedi tikwe ye kräke’. Niaratre nämene mröre ye ngwane Ester niaratre nübaibare bobukäreta mrö mada sribedi kwe yebätä. Mrö sribebare bobukäre kwe ye ngwane, rei ngwantaribare bobukäre Ester ie: ‘¿Mä tö drei?’. Ester niebare ie: ‘Ni iti tö ti aune juta tikwe murie ketai. Mä raba nun mike kwäre’. Rei ngwantaribare ie: ‘¿Nire tö mä murie ketai?’. Niarakwe niebare: ‘Ni töi käme, Hamán noko’. Asuero namani rubun krubäte yebätä jötrö ngwarbe Hamán murie keta namabare kwe.

Akwa Hamán kukwe ükaninte ye ni ñaka jire iti aune rei ñaka raba juen ngwarbe. Aisete rei käkwe Mardoqueo kädekani nitre ütiäte ye jie ngwankäre aune niara rabadre kukwe mrä ükete niebare kwe ie. Kukwe ükaninte mrä yebätä nie nämene nane nitre judío ye rüe rakadrekä ye ngwane niaratre rabadre ja ngie mike. Köbö 13 sö adar ye ngwane, nitre judío käkwe nitre rüe ye ganainbare. Köbö yete ja känenkäre, nitre judío gananbare ye niaratre jatani käi ngwen juto jabätä kä kwatire kwatire.