Si Ester isa ka Judiyo nga babayi nga nagaistar sa Susan nga siudad sang Persia. Madamo na nga tuig ang nagligad sang ang iya pamilya ginbihag ni Nabocodonosor halin sa Jerusalem. Ang iya pakaisa nga si Mardoqueo ang nagpadaku sa iya, nga isa ka alagad ni Hari Ahasuero sang Persia.

Gusto ni Hari Ahasuero sang bag-o nga rayna. Gani gindala sang iya mga alagad sa iya ang pinakaguapa nga mga babayi sa pungsod, pati na si Ester. Sa tanan nga mga babayi, si Ester ang ginpili sang hari nga mangin rayna. Ginsilingan ni Mardoqueo si Ester nga indi manugid nga Judiyo sia.

Ang hambog nga tawo nga si Haman amo ang pangulo sang tanan nga prinsipe. Gusto niya nga magyaub ang tanan sa iya. Pero indi magyaub sa iya si Mardoqueo, amo nga akig gid si Haman sa iya kag gusto niya sia patyon. Sang nahibaluan ni Haman nga Judiyo si Mardoqueo, nagplano sia nga patyon ang tanan nga Judiyo sa pungsod. Ginsilingan niya ang hari: ‘Delikado gid kita sa mga Judiyo; kinahanglan mo sila pamatyon tanan.’ Si Ahasuero nagsiling: ‘Himua ang tanan nga dapat mo himuon,’ dayon ginhatagan niya sia sing awtoridad nga maghimo sing kasuguan. Naghimo si Haman sing kasuguan nga pamatyon ang tanan nga Judiyo sa ika-13 nga adlaw sang bulan sang Adar. Pero nakita ni Jehova ang nagakatabo.

Wala makahibalo si Ester parte sini nga kasuguan. Gani ginpadal-an sia ni Mardoqueo sang kopya sini kag ginsilingan sia: ‘Magkadto ka sa hari para makig-istorya sa iya.’ Si Ester nagsiling: ‘Ang bisan sin-o nga magkadto sa hari nga wala ginpatawag pagapatyon. Treinta na ka adlaw nga wala ako ginpatawag sang hari! Pero makadto ako sa iya. Kon untayon niya ang iya setro, indi ako pagpatyon. Pero kon indi niya pag-untayon, pagapatyon ako.’

Nagkadto si Ester sa hari. Sang nakita sia sang hari, gin-untay sini ang iya setro. Nagpalapit si Ester kag ginpamangkot sia  sang hari: ‘Ano ang kinahanglan mo, Ester?’ Si Ester nagsiling: ‘Gusto ko kamo imbitahon ni Haman sa sinalusalo.’ Sang ara na sila sa sinalusalo, gin-imbitar sila liwat ni Ester sa ikaduha nga sinalusalo. Sa ikaduha nga sinalusalo, ginpamangkot sia liwat sang hari: ‘Ano ang gusto mo nga pangayuon sa akon?’ Si Ester nagsiling: ‘May gusto magpatay sa akon kag sa akon katawhan. Palihug luwasa kami.’ Namangkot ang hari: ‘Sin-o ang gusto magpatay sa imo?’ Si Ester nagsabat: ‘Ining malain nga si Haman.’ Naakig gid si Ahasuero amo nga ginpapatay niya dayon si Haman.

Pero indi na mabag-o ang kasuguan ni Haman, bisan sang hari. Gani ginhimo sang hari si Mardoqueo nga pangulo sang mga prinsipe kag ginhatagan sia sing awtoridad nga maghimo sing bag-o nga kasuguan. Naghimo si Mardoqueo sing kasuguan nga puede magbato ang mga Judiyo kon salakayon sila. Sang ika-13 nga adlaw sang Adar, napierde sang mga Judiyo ang ila mga kaaway. Sugod sadto, ginaselebrar nila ini nga kadalag-an kada tuig.