Esta bụ nwa agbọghọ onye Juu. Ha bi n’obodo Shushan dị na Peshia. Ọtụtụ afọ tupu mgbe ahụ, ezinụlọ ha so ná ndị Nebukadneza si na Jeruselem dọrọ n’agha. Ọ bụ nwa nwanne papa Esta aha ya bụ Mọdekaị zụrụ ya. Mọdekaị na-ejere eze ndị Peshia aha ya bụ Ahazuirọs ozi.

Eze Ahazuirọs chọrọ ịlụ nwaanyị ọhụrụ. Ndị na-ejere ya ozi kpọtaara ya ụmụ nwaanyị ndị kacha maa mma n’obodo Peshia. Esta sokwa ná ndị a kpọtaara ya. N’ime ụmụ nwaanyị niile a kpọtaara ya, eze họọrọ Esta ka ọ bụrụ nwunye ya. Mọdekaị gwara Esta ka ọ ghara ịgwa onye ọ bụla na ọ bụ onye Juu.

Otu nwoke aha ya bụ Heman bụ onyeisi nke ndị isi niile e nwere na Peshia. Nwoke a bụ onye okomoko. Ọ chọrọ ka onye ọ bụla na-akpọrọ ya isi ala. Mọdekaị ekweghị akpọrọ ya isi ala, ezigbo iwe ewee ya nke na ọ chọwara igbu ya. Mgbe Heman chọpụtara na Mọdekaị bụ onye Juu, ọ haziri otú a ga-esi egbu ndị Juu niile bi na Peshia. Ọ gwara eze, sị: ‘Ndị Juu bụ ndị ọjọọ. I kwesịrị igbu ha niile.’ Ahazuirọs gwara ya, sị: ‘Mee ihe ọ bụla ị chọrọ ime.’ O nyekwara Heman ikike ime iwu maka ihe ọ chọrọ ime. Heman mere iwu kwuru ka e gbuo ndị Juu niile n’abalị iri na atọ nke ọnwa ndị Juu a na-akpọ Eda. Jehova nọ na-ele ihe na-emenụ.

Esta amaghị banyere iwu a. N’ihi ya, Mọdekaị zigaara ya akwụkwọ iwu ahụ, ma gwa ya, sị: ‘Gaa gwa eze ihe na-emenụ.’ Esta gwara ya, sị: ‘Ọ bụrụ na mmadụ agaa ịhụ eze ma eze akpọghị ya, a ga-egbu ya. Eze akpọbeghị m ka m bịa hụ ya kemgbe abalị iri atọ ugbu a. Ma, m ga-aga hụ ya. Ọ bụrụ na o setịara m mkpanaka ya, a gaghị egbu m. Ọ bụrụkwanụ na o setịghịrị m mkpanaka ya, a ga-egbu m.’

 Esta mechara gawa n’obí eze. Mgbe eze hụrụ ya, ya esetịara ya mkpanaka ya. Ọ gakwuuru eze, eze ajụọ ya, sị: ‘Esta, gịnị ka m ga-emere gị?’ Esta gwara ya, sị: ‘M ga-achọ ka gị na Heman bịa oriri n’ụlọ m.’ Ka ha nọ na-eri ihe, Esta kpọkwara ha oriri ọzọ. Mgbe ha gara, eze jụrụ Esta ọzọ, sị: ‘Gịnị ka m ga-emere gị?’ Esta gwara ya, sị: ‘E nwere onye chọrọ igbu mụ na ndị obodo anyị. Biko, napụta anyị.’ Eze jụrụ ya, sị: ‘Ònye chọrọ igbu gị?’ Esta gwara ya, sị: ‘Ọ bụ Heman ọjọọ a.’ Ezigbo iwe were Ahazuirọs nke na o nyere iwu ka e gbuo Heman ozugbo.

Ma, ọ dịghị onye nwere ike ịkagbu iwu ahụ Heman mere. Eze enwedịghị ike ịkagbu ya. Eze meziri Mọdekaị onyeisi nke ndị isi niile e nwere na Peshia ma nye ya ikike ime iwu ọhụrụ. Mọdekaị mere iwu nke nyere ndị Juu ikike igbu onye ọ bụla bịara igbu ha. Ndị Juu meriri ndị iro ha n’abalị iri na atọ nke ọnwa Eda. Kemgbe ahụ, ha na-eme ememme kwa afọ iji cheta ụbọchị ahụ ha meriri.