Eshta gaw Persi mungdan, Shushan mare hta nga ai Yuda shayi sha re. Lai wa sai shaning law law hta, Eshta a jiwoi jiwa ni hpe Hkawhkam Nebuhkadneza gaw Yerusalem kaw nna woi sa wa ai re. Kahpu daw ai Mordehkai gaw Eshta hpe bau maka wa ai. Mordehkai gaw Persi hkawhkam Ahasuru kaw magam gun ai.

Hkawhkam Ahasuru gaw hkawhkam jan nnan lata mayu ai. Dai majaw, shi a mayam ni gaw mungdan ting kaw nga ai, tsawm dik htum shayi sha ni hpe shaga sa wa ai. Dai hta, Eshta mung lawm ai. Hkawhkam wa gaw dai shayi sha ni kaw nna Eshta hpe hkawhkam jan hku nna lata la ai. Tinang gaw Yuda shayi sha re ai lam, n tsun na matu Eshta hpe Mordehkai htet dat ai.

Haman gaw du agyi salang ni yawng a ningbaw re. Shi gaw gumrawng gumtawng myit rawng ai wa re. Masha shagu shi hpe gum dagup let nawku ai hpe ra sharawng ai. Mordehkai gaw dai hku n galaw ai majaw, Haman grai pawt nna shi hpe sat kau mayu ai. Mordehkai gaw Yuda masha re ai hpe Haman chye mat ai shaloi, mungdan ting na Yuda masha ni hpe sat na matu masing jahkrat dat ai. Hkawhkam wa hpe shi ndai hku sa tsun ai: ‘Yuda amyu masha ni gaw grai shoihpa nga ai masha ni re. Amyu ting hpe shamyit kau ra ai.’ Ahasuru gaw: ‘Nang galaw mayu ai hku galaw dat u’ ngu tsun nna shi hpe ahkang aya jaw dat ai. Dai majaw, Haman gaw Adara shata 13 ya shani hta, Yuda masha yawng hpe sat kau na matu tara jahkrat dat ai. Dai lam hpe Yehowa yu taw nga ai.

Eshta gaw dai hku tara jahkrat dat ai hpe n chye ai. Dai majaw, Mordehkai gaw dai tara laika hpe Eshta hpang shagun dat ya nna, ndai hku htet dat ai: ‘Hkawhkam wa kaw sa nna wa tsun u.’ Eshta ndai hku bai htet dat ai: ‘Hkawhkam wa n shaga ai sha, shi kaw shang ai wa kadai mung sat kau hkrum na re. Ngai hpe n shaga ai nhtoi 30 ya na sai. Raitim, ngai sa na. Lama na, shi a sumdoi ngai hpe ladawn yang, ngai asak hkrung lu na re. N ladawn yang gaw, ngai si na re.’

Eshta gaw hkawhkam wang kata de sa mat ai. Hkawhkam wa gaw Eshta hpe mu yang, shi a sumdoi hpe ladawn ya ai. Hkawhkam wa hpang de shi sit sa wa yang: ‘Eshta, na matu ngai hpa galaw ya ra na kun?’ nga nna  hkawhkam wa san ai. Eshta ndai hku bai tsun ai: ‘Hkawhkam wa hte Haman hpe lusha daw mayu ai.’ Lusha poi hta Eshta gaw hpang shani bai sa wa na matu kalang bai saw shaga ai. Lahkawng lang ngu na lusha poi shani hta, hkawhkam wa gaw ndai hku bai san ai: ‘Na a matu ngai hpa galaw ya ra na kun?’ Shi ndai hku tsun ai: ‘Ngai hte nye a amyu masha ni hpe marai langai ngai sat na hkyen sai. Chyeju hte anhte hpe hkye la ya rit.’ Hkawhkam ndai hku tsun ai: ‘Nang hpe kadai sat mayu ai rai?’ Eshta ndai hku bai tsun ai: ‘Ndai n hkru ai Haman re!’ Ahasuru gaw grai masin pawt nna, kalang ta Haman hpe sat kau shangun ai.

Haman jahkrat da ai tara hpe kadai mung bai n lu galai shai ya ai. Hkawhkam wa mung n mai galai shai ya lu ai. Dai majaw, hkawhkam wa gaw Mordehkai hpe du agyi salang ni a ningbaw shatai nna, tara laika nnan shapraw na matu ahkang jaw dat ai. Yuda masha ni gaw hpyen ni sa gasat ai hpe ninghkap nna, tinang hkum tinang makawp maga na ahkang nga ai ngu Mordehkai tara nnan jahkrat dat ai. Adara shata 13 ya shani hta, Yuda masha ni gaw shanhte a hpyen ni hpe awng dang lu mat ai. Dai majaw, Adara shata 14 ya shani du yang, shaning shagu awng padang poi galaw ma ai.