Vaĩ mwĩĩtu ũmwe Mũyuti weetawa Esita ũla wekalaa ndũanĩ ya Avelisia yeetawa Susani. Nĩvathelete myaka mingĩ kuma yĩla Esita na andũ ma mũsyĩ wake maumiwʼe Yelusaleme nĩ Nevukatilesa. Esita aeetwe nĩ mũndũũme weetawa Molitekai ũla waĩ mũthũkũmi wa Mũsumbĩ Aasuelo wa Velisia. Ĩthe wa Esita na ĩthe wa Molitekai nĩmasyaanĩwʼe.

Ve ĩvinda yavikie Mũsumbĩ Aasuelo enda kũtwaa kĩveti kĩngĩ. Athũkũmi make nĩmamũeteie eĩtu ala maĩ anake vyũ kuma kĩsionĩ kĩla wasumbĩkĩte, na Esita aĩ ũmwe katĩ woo. Na katĩ wa eĩtu asu onthe, mũsumbĩ anyuvie Esita ethĩwe e kĩveti kyake. Na Molitekai amwĩa Esita ndakaatate kũweta kana we nĩ Mũyuti.

Ĩvindanĩ yĩu, mũndũũme ũmwe waĩ ngathĩĩo weetawa Amani nĩwe waĩ mũtongoi wa anene onthe ũsumbĩnĩ wa Aasuelo. Mũndũũme ũsu endaa kĩla mũndũ amũkumanĩe. Molitekai nĩwaleile kũmũkumanĩa, na Amani nĩwathilĩkile mũno na asũanĩa kũmũaa. Yĩla Amani wamanyie kana Molitekai aĩ Mũyuti, nĩwavangie nzama oae Ayuti onthe ala maĩ kĩsionĩ kĩu. Na kwoou amwĩa mũsumbĩ: ‘Ayuti nĩ andũ athũku vyũ na nĩwaĩle kũmamina.’ Nake Aasuelo amũsũngĩa amwĩa: ‘Ĩka ũndũ ũkwĩwʼa ũyenda,’ na amũnenga ũkũmũ aseũvye mwĩao. Kwoou Amani nĩwaseũvisye mwĩao ũla wanenganĩte mwanya Ayuti onthe moawe mũthenyanĩ wa 13 wa mwei wa Atali. Ĩndĩ Yeova nĩweene maũndũ asu onthe.

Esita ndaamanya kana ve mwĩao wanenganĩte mwanya Ayuti moawe. Kwoou Molitekai anengane valũa waandĩkĩtwe mwĩao ũsu nĩ kana Esita atwaĩwe, na asya atĩĩ: ‘Thi ũkaneene na mũsumbĩ.’ Esita atavwʼa ũu aisye atĩĩ: ‘Mũndũ o na wĩva ũla ũtataa kũthi mbee wa mũsumbĩ atemũthokye aĩle kũawa. Nĩvathelete mĩthenya 30 ndona mũsumbĩ ainthokya nĩthi mbee wake. Ĩndĩ nĩngũthi. Andambũũkĩsya ndata yake ya ũsumbĩ ndiũawa. Ĩndĩ aema kwĩka ũu, nĩnĩsĩ nĩngũawa.’

Esita nĩwaendie vala mũsumbĩ wekalaa. Yĩla mũsumbĩ wamwonie nĩwamũtambũũkĩisye ndata yake ya ũsumbĩ. Na  ũu nĩwatumie Esita amũthengeea, na ĩndĩ mũsumbĩ amũkũlya: ‘Wĩenda ata Esita?’ Nake Esita amũsũngĩa amwĩa: ‘Nĩenda kũseũvya mboka na ndimũthokya mwĩ na Amani.’ Maendeee kũtanĩa mboka mũthenya ũsu, Esita nĩwamathokisye mbokanĩ ĩngĩ. Maendeee na kũtanĩa mboka ĩsu ya kelĩ, mũsumbĩ nĩwasyokie amũkũlya Esita atĩĩ: ‘Wĩenda ata Esita?’ Nake amũsũngĩa amwĩa: ‘Ve mũndũ ũvangĩte kũmbũaa nyie vamwe na andũ ma mbaĩ yakwa. Mwa mũsumbĩ tũtangĩĩe.’ Nĩvo ĩndĩ mũsumbĩ wamũkũlilye: ‘Nũũ ũkwenda ũkũaa?’ Nake Esita amũsũngĩa amwĩa: ‘Nĩ mũndũ ũũ mũthũku Amani.’ Ndeto isu Esita waneenie syatumie Aasuelo athata mũno nginya asya Amani nĩoawe saanĩ ũsu.

O na ũu wĩ o vo, vaiĩ mũndũ waĩ atonya kũvetanga ũla mwĩao waseũvĩtwʼe nĩ Amani, o na mũsumbĩ ndaĩ atonya. Ũu nĩwatumie mũsumbĩ amũtwʼĩkĩthya Molitekai mũtongoi wa anene ũsumbĩnĩ ũsu na amũnenga ũkũmũ wa kũseũvya mwĩao mweũ. Na kwoou Molitekai aseũvya mwĩao mweũ ũla weetĩkĩlĩtye Ayuti mesiĩĩe mo ene ĩvinda yĩla mavithũkĩwa. Mũthenyanĩ wa 13 wa mwei wa Atali, Ayuti nĩmasindie amaitha moo. Kuma vau kĩla mwaka nĩmatanĩaa ũsindi ũsu.