Li xʼEster jun saaj ixqaʼal aj Judiiy li wank saʼ jun li tenamit re Persia li naxkʼabʼaʼi Susa. Ak naabʼal chihabʼ xnumik naq li awabʼej Nabucodonosor kirisi saʼ Jerusalen li xjunkabʼal li xʼEster ut kixkʼam chirix. Xkʼirisiik xbʼaan laj Mardoqueo, li xpriim, xmoos chaq li awabʼej Asuero re Persia.

Li awabʼej Asuero naraj jun chik li ixqaʼal li twanq choʼq awabʼej. Joʼkan naq, ebʼ li xmoos keʼxkʼam re li awabʼej ebʼ li ixqaʼal re li tenamit li jwal chʼinaʼusebʼ, ut li xʼEster jun rehebʼ. Saʼ xyanqebʼ aʼan, li awabʼej kixsikʼ ru li xʼEster choʼq awabʼej. Laj Mardoqueo kixye re li xʼEster naq re maaʼani tixye naq aj Judiiy.

Jun li qʼetqʼet aj winq li naxkʼabʼaʼi Haman aj jolominel chaq saʼ xbʼeen chixjunilebʼ li ninqebʼ xwankil. Aʼan kiraj naq chixjunilebʼ teʼxwiqʼibʼ ribʼ chiru. Abʼan laj Mardoqueo inkʼaʼ naxwiqʼibʼ ribʼ chiru. Laj Haman kʼajoʼ naq kipoʼk joʼkan naq kiraj xkamsinkil. Naq laj Haman kixnaw naq laj Mardoqueo aj Judiiy, kixkʼoxla jun li naʼlebʼ re xkamsinkil chixjunilebʼ laj Judiiy re li tenamit. Kixye re li awabʼej: «Xiw xiwebʼ laj Judiiy. Tento tqakamsi chixjunilebʼ». Laj Asuero kixye: «Bʼaanu li kʼaru us choʼq aawe». Ut kixkʼe xleseens re naq tixyiibʼ jun li chaqʼrabʼ. Saʼ li chaqʼrabʼ kixye chaq naq saʼ li 13 re li po Adar ebʼ li poyanam tento naq teʼxkamsi ebʼ laj Judiiy. Abʼan li Jehobʼa yook rilbʼal chixjunil.

Li xʼEster inkʼaʼ naxnaw chirix li chaqʼrabʼ aʼin. Joʼkan naq laj Mardoqueo kixtaqla re li hu ut kixye re: «Tento tat-aatinaq rikʼin li awabʼej». Li xʼEster kixsume: «Wi junaq li poyanam twulaq rilbʼal li awabʼej chi inkʼaʼ bʼoqbʼil xbʼaan, tento tkamsiiq. Ut chalen 30 kutan maajiʼ nikinxbʼoq li awabʼej. Abʼan tinxik rilbʼal. Wi tixyeʼ li xxuqʼ chiwu, inkʼaʼ tinkamq. Abʼan wi inkʼaʼ tixbʼaanu, tinkamq».

Li xʼEster xkoho saʼ xnebʼaal rochoch li awabʼej. Naq kiʼileʼk ru, li awabʼej kixyeʼ li xxuqʼ chiru. Li xʼEster kinachʼok chiru, ut li awabʼej kixpatzʼ re: «Kʼaru nakaawaj,  Ester?». Li xʼEster kixye: «Nawaj naq tatkʼulunq chi waʼak saʼ li ninqʼe li tinkʼubʼ, aawochbʼenaq laj Haman». Saʼ li waʼak aʼin, li xʼEster kixbʼoqebʼ saʼ jun chik li waʼak. Saʼ li xkabʼ waʼak, li awabʼej kixpatzʼ wiʼ chik re li xʼEster: «Kʼaru taawaj?». Aʼan kixye: «Wank jun li poyanam naraj qakamsinkil laaʼin ut lintenamit. Chooʼaakol, bʼaanu usilal». Li awabʼej kixpatzʼ: «Ani naraj aakamsinkil?». Li xʼEster kixye re: «Laj Haman li maaʼus aj winq aʼin». Kʼajoʼ naq kipoʼk laj Asuero ut saʼ junpaat kixtaqla xkamsinkil laj Haman.

Abʼan maaʼani naru xsachbʼal li chaqʼrabʼ li kixbʼaanu laj Haman, chi moko li awabʼej. Joʼkan naq li awabʼej kixxaqabʼ laj Mardoqueo choʼq aj jolominel saʼ xbʼeenebʼ li winq li wankebʼ xwankil ut kixkʼe xleseens re naq tixkʼubʼ jun chik li chaqʼrabʼ. Li chaqʼrabʼ aʼin naxye naq ebʼ laj Judiiy teʼruuq xkolbʼal ribʼ naq teʼchalq xkamsinkilebʼ. Saʼ li kutan 13 re li po Adar, ebʼ laj Judiiy keʼruuk xqʼaxbʼal ruhebʼ li xikʼ nekeʼilok rehebʼ. Chalen chaq aʼin, ebʼ laj Judiiy rajlal chihabʼ keʼok xnimankil ru li qʼaxok u aʼin.