Esiteri aarĩ Mũyahudi waikaraga Perisia itũũra-inĩ rĩa Shushani. Famĩlĩ yao yarutĩtwo Jerusalemu nĩ Nebukadinezaru mĩaka mĩingĩ mbere ĩyo. Aarerirũo nĩ mũriũ wa mũrũ wa nyina na ithe wetagwo Moridekai, ũrĩa warĩ ndungata ya Mũthamaki Ahasuerusu.

Mũthamaki Ahasuerusu nĩ eendaga kũhikia mũtumia ũngĩ. Ndungata ciake nĩ ciamũtwarĩire airĩtu arĩa athaka mũno bũrũri-inĩ ũcio na Esiteri aarĩ ũmwe wao. Harĩ airĩtu acio othe mũthamaki atwarĩirũo, Esiteri nĩwe aathurire atuĩke mũtumia wake. Moridekai nĩ eerĩte Esiteri ndakoimbũre atĩ aarĩ Mũyahudi.

Mũndũ ũmwe warĩ mwĩtĩi wetagwo Hamani nĩwe warũgamĩrĩire anene othe. Eendaga andũ othe mamũinamĩrĩre. Moridekai nĩ aaregire kũmũinamĩrĩra, na nĩ ũndũ ũcio Hamani nĩ eendaga kũmũũraga. Rĩrĩa Hamani aamenyire atĩ Moridekai aarĩ Mũyahudi, nĩ aabangire ũrĩa Ayahudi othe bũrũri-inĩ ũcio mangĩoragirũo. Eerire mũthamaki ũũ: ‘Ayahudi nĩ andũ oru mũno, magĩrĩirũo kũninwo.’ Ahasuerusu aamwĩrire eke ũrĩa arona kwagĩrĩire, agĩcoka akĩmũhe ũhoti wa gũthondeka watho. Hamani aathondekire watho woigaga atĩ Ayahudi othe moragwo mweri-inĩ wa Adari. Jehova nĩ onaga maũndũ macio mothe.

Esiteri ndaamenyaga ũhoro wĩgiĩ watho ũcio. Nĩ ũndũ ũcio Moridekai nĩ aamũtũmĩire kobĩ ya watho ũcio na akĩmwĩra ũũ: ‘Thiĩ warie na Mũthamaki.’ Nake Esiteri akĩmwĩra: ‘Mũndũ o wothe angĩthiĩ harĩ mũthamaki atetĩtwo no kũũragwo angĩũragwo. Mũthamaki ndanjĩtĩte kwa ihinda rĩa thikũ 30 no nĩ ngũthiĩ. Angĩtambũrũkia rũthanju rwake ndikũragwo, no aaga kũrũtambũrũkia no ngũragwo.’

Esiteri nĩ aathiire kũrĩ mũthamaki. Rĩrĩa mũthamaki aamuonire nĩ aatambũrũkirie rũthanju rwake. Esiteri nĩ aathiire harĩ we, na mũthamaki akĩmũũria ũũ: ‘Ũkwenda  ngwĩkĩre atĩa Esiteri?’ Nake akĩmwĩra: ‘Ngwendaga kũmwĩta iruga mũrĩ na Hamani.’ Marĩ iruga-inĩ rĩu, Esiteri nĩ aametire iruga rĩngĩ aabangaga. Marĩ iruga-inĩ rĩa kerĩ, mũthamaki aamũririe ũũ: ‘Ũkwenda ngwĩkĩre atĩa?’ Nake akĩmwĩra: ‘Kũrĩ mũndũ ũbangĩte kũnjũraga hamwe na andũ aitũ. Ndagũthaitha ũtũhonokie.’ Mũthamaki akĩmũũria: ‘Nũ ũcio ũrenda kũmũũraga?’ Nake akĩmwĩra: ‘Nĩ Hamani ũyũ mũũru.’ Ahasuerusu nĩ aarakarire mũno na akiuga Hamani oragwo o hĩndĩ ĩyo.

O na kũrĩ ũguo, gũtirĩ mũndũ o na ũmwe nginya mũthamaki ũngĩahotire kweheria watho ũrĩa Hamani aathondekete. Kwoguo mũthamaki aatuire Moridekai mũrũgamĩrĩri wa anene othe, na akĩmũhe ũhoti wa gũthondeka watho mwerũ. Moridekai nĩ aaathondekire watho wahotithirie Ayahudi kwĩgitĩra maatharĩkĩrũo. Mũthenya wa 13 wa Adari, Ayahudi nĩ maatooririe thũ ciao. Kuuma hĩndĩ ĩyo nĩ makũngũyagĩra ũhootani ũcio o mwaka.