Ester okwa li okakadona Okajuda oko ka li haka di moshilando shOvapersia shedina Susan. Eedula dihapu da ka pita, oukwaneumbo wavo owa li wa kufwa muJerusalem kuNebukadnesar. Okwa tekulwa kumumwaina Mordekai, omupiya wohamba yaPersia, Ahasveros.

Ohamba Ahasveros oya li tai kongo omumbada mupe. Ovapiya vayo ova li ve i etela oukadona ve na ondjelo iwa moshilongo ashishe, mwa kwa telwa Ester. Moukadona aveshe ovo, ohamba oya hoolola mo Ester oye a ninge omumbada wayo. Mordekai okwa li a lombwela Ester aha lombwele ovanhu kutya Omujuda.

Omulumenhu omulinenepeki wedina Haman oye a li omukulunhu womalenga aeshe. Okwa li a hala ovanhu aveshe ve mu linyongamene. Mordekai okwa li a anya oku mu linyongamene, na Haman okwa li a handuka neenghono nokwa li a hala oku mu dipaa. Eshi Haman a shiiva kutya Mordekai Omujuda, okwa li a pangela omhangela yokudipaifa Ovajuda aveshe moshilongo. Okwa lombwela ohamba a ti: ‘Ovajuda ova nyika oshiponga nova pumbwa okuhanaunwa po.’ Ahasveros okwa nyamukula a ti: ‘Ninga keshe osho wa hala,’ nokwe mu pa eenghono dokutota po omhango. Haman okwa tota po omhango oyo ya lombwela ovanhu va dipae Ovajuda aveshe mo 13 omwedi Adar. Jehova okwa li e wete keshe osho tashi ningwa.

Ester ka li e shii kombinga yomhango oyo. Opo nee Mordekai okwa li a tumina Ester okopi yomhango ndele ta ti: ‘Inda ndele to ka popya nohamba.’ Ester okwa ti: ‘Keshe ou ta ka ya kohamba ina ifanwa ko, ota ka dipawa. Ohamba inai ifana nge oule womafiku 30. Ashike ohandi i ngoo. Ngeenge oya yelula odibo yayo, ohandi kala nomwenyo, nongeenge inai shi ninga, ohandi ka fya.’

Opo nee Ester okwa ya konduda yohamba. Eshi ohamba ye mu mona, oya yelula odibo yayo. Ester okwa ya kohamba ndele tai mu pula tai ti: ‘Owa hala ndi ku ningile shike  Ester?’ Okwa nyamukula a ti: ‘Onda hala ndi mu shive nye naHaman koshivilo.’ Eshi va ya koshivilo, Ester okwa li e va shiva vali koshivilo oshitivali. Pefimbo loshivilo oshitivali, ohamba oya pula natango tai ti: ‘Owa hala ndi ku ningile shike?’ Ester okwa ti: ‘Ope na umwe oo ta ka dipaa nge noshiwana shetu. Alikana tu xupifa.’ Ohamba oya pula tai ti: ‘Olyelye a hala oku mu dipaa?’ Okwa nyamukula a ti: ‘Omulumenhu oo omukolokoshi, Haman.’ Ahasveros okwa li a handuka unene nokwa li nokuli a hala ngeno okwa dipaa Haman pefimbo opo tuu opo.

Ashike kapa li oo ta dulu okulundulula omhango yaHaman, nohamba kaya li tai dulu nokuli. Onghee hano, ohamba oya ninga Mordekai omukulunhu womalenga ndele te mu pe eenghono opo a tote po omhango ipe. Mordekai okwa li a tota po omhango oyo ya li ya pitika Ovajuda ve liamene ngeenge va ponokelwa. Mo 13 omwedi Adar, Ovajuda ova li va finda ovatondi vavo. Okudja opo, ova kala nokudana efindano olo odula keshe.