Ɛsta na bin wan Ju uman we de na wan Pashia siti we dɛn kɔl Shushan. Lɔng tɛm bin dɔn pas afta we Nɛbyukadnɛza pul in famili kɔmɔt na Jerusɛlɛm. I mɛn wit in kɔzin we nem Mɔdikay we na bin savant to Kiŋ Aazuirɔs.

Kiŋ Aazuirɔs bin want fɔ gɛt wan nyu kwin. In savant dɛn kam wit ɔl di fayn fayn uman dɛn na di land ɛn Ɛsta na wan pan dɛn. Pan ɔl di uman dɛn, di kiŋ pik Ɛsta fɔ bi di kwin. Mɔdikay tɛl Ɛsta mek i nɔ tɛl ɛnibɔdi se in na Ju.

Wan man we nem Eman bin rili prawd ɛn na in bin de oba ɔl di prins dɛn. I bin want ɔlman fɔ de butu bifo am. Mɔdikay nɔ bin gri fɔ butu bifo am, so dat mek Eman vɛks bad, ɛn i bin want fɔ kil am. We Eman kam fɔ no se Mɔdikay na Ju, i plan fɔ kil ɔl di Ju dɛn na di land. I tɛl di kiŋ se: ‘Di Ju dɛn na bad pipul dɛn; yu nid fɔ kil dɛn.’ Aazuirɔs tɔk se: ‘Du ɛnitin we yu nid fɔ du,’ ɛn i gi am pawa fɔ mek wan lɔ. Eman mek wan lɔ fɔ mek di pipul dɛn kil ɔl di Ju dɛn insay di 13 de na di mɔnt we dɛn kɔl Eda. Jiova bin de wach.

Ɛsta nɔ bin no bɔt di lɔ. So Mɔdikay rayt di lɔ ɛn sɛn am fɔ am ɛn tɛl am se: ‘Go tɔk to di kiŋ.’ Ɛsta tɔk se: ‘Dɛn go kil ɛnibɔdi we go to di kiŋ we i nɔ invayt am. Di kiŋ nɔ kɔl mi fɔ go to am fɔ 30 dez naw! Bɔt a go go de. If i pɔynt in gold stik pan mi, a nɔ go day. Bɔt if i nɔ pɔynt am pan mi, a go day.’

Ɛsta go na di kiŋ in os. We di kiŋ si am, i pɔynt in gold stik pan am. I go to am, ɛn di kiŋ aks am se: ‘Ɛsta, wetin yu want mek a du fɔ yu?’ Ɛsta tɔk se: ‘A want fɔ invayt yu ɛn Eman fɔ kam it na mi os.’ We dɛn bin de it, Ɛsta invayt  dɛn bak fɔ kam fɔ it. We dɛn de it di sɛkɔn tɛm, di kiŋ aks Ɛsta bak se: ‘Wetin yu want mek a du fɔ yu?’ I tɛl am se: ‘Pɔsin de we want fɔ kil mi ɛn mi pipul dɛn. Duya sev wi.’ Di kiŋ aks am se: ‘Udat want fɔ kil yu?’ Ɛsta tɛl am se: ‘Na dis wikɛd man we nem Eman.’ Dat mek Aazuirɔs vɛks bad bad wan, ɛn i mek dɛn kil Eman wantɛm wantɛm.

Bɔt nɔbɔdi nɔ ebul fɔ pwɛl di lɔ we Eman bin dɔn mek, ivin di kiŋ insɛf nɔ ebul fɔ du dat. So di kiŋ mek Mɔdikay de oba di prins dɛn, ɛn i gi am pawa fɔ mek wan nyu lɔ. Di lɔ we Mɔdikay mek bin alaw di Ju dɛn fɔ fɛt fɔ dɛnsɛf we dɛn go atak dɛn. Insay di 13 de na di mɔnt we dɛn kɔl Eda, di Ju dɛn bin win dɛn ɛnimi dɛn. Frɔm da tɛm de, dɛn bin de sɛlibret di win we dɛn bin win ɛni ia.