Chuunɔɔ Ɛsita wa ni. O lɛŋnde Paasiaaleŋ niŋ o wa ni o chioo Susa. Wɔsila bɔɔbɔɔ laa hiou niŋ chɔŋ a teleŋ Nɛbukanɛɛsa kɔ bii yuŋgu ndɔɔ Chulusalɛm ndo. Mɔdikai bom ndɔ manda ndu ni. Nduyɛ buɛiyo Mɔdikai wa ni, le Masa wa o lɛŋnde Paasiaaleŋ niŋndo Ahasaliɔɔ.

Masaa Ahasaliɔɔ ndoo yeema lanɔ sɛnɛiyo. Le hei, mi buɛiyaa nduaa chuu ndu waŋ laanduaa kɛndɛ kɛndiaa o lɛŋnde leŋ niŋ. Nduyɛ Ɛsita bɛɛ wa nda tɛɛŋ. O waŋ laanduaa haa tɛɛŋ kpou, mi masaa hɛli Ɛsita le mbo wa laa ndɔ. Mi Mɔdikai dimul Ɛsita maa o chɔɔmuŋ maa Chuunɔɔ le o cho le.

Wana wa buɛiyaa masaa kpou bolleŋ ndo wa Hemaŋ ni, nduyɛ yoŋgaa pila ndoo nɔ ni. Ndoo yeema mi wana o wana wa ndu wulaŋ beŋ ndo. Kɛ mi Mɔdikai kɛɛ le Hemaŋ wulaŋ beŋ ndo. Le hei, mi Hemaŋ tuulu kɔl, mbo yeema pɛŋ le ndu diyɔɔ. Mɛɛ Hemaŋ sina maa Chuunɔɔ Mɔdikai cho ni, mbo kɛɛsiaa le Chuuwa kpou diyɔɔ o lɛŋnde leŋ niŋ. Mbo dimul masaa aa: ‘Wanaa lakpundiaa Chuuwa cho ni. A nɔ ma diu diu nda kpou.’ Mi Ahasaliɔɔ dimul ndu aa: ‘Tosa nyɛ o nyɛ ŋ yeema pɛ.’ Nduyɛ mbo ke ndu kpaayaa le mbo dɔu sawaa. Mi Hemaŋ duau sawaa. Nduyɛ, mbo dimul waŋnda le ma diu diu Chuuwa kpou o paŋgii Ada ve niŋ 13. Chɛhowa wa nyɛ o nyɛ chɔɔ.

Ɛsita ndoo sina a sawaa hoo okɔɔ le. Le hei, mi Mɔdikai yɔŋ ndu yauwo a sawaa hoo okɔɔ, okoŋ mbo dimul ndu aa: ‘Kɔ ma soo o masaa lo.’ Mi Ɛsita dimi aa: ‘Wana o wana kuɛ pɛ o masaa lo mbo veelu num te, a dii num. Nduyɛ palɛi 30 hiou niŋ ni masaa veelu wɔ ya le. Kɛ I cho lakɔ. Te o yulul la pɛ tinda ndɔɔ, mɛɛ a cho ya diyɔɔ le. Kɛ te o yulul la tinda ndɔɔ le, mɛɛ a cho ya diyɔɔ.’

Mi Ɛsita kua naa masaa chua. Mɛɛ masaa che ndu, mbo yulul ndu tinda ndɔɔ. Mbo kua naa o cho wa, okoŋ mi masaa nyuna ndu aa: ‘Yɛɛnɛ ŋ yeema yɛ mi tosal num Ɛsita?’ Mi Ɛsita mulul ndu aa: ‘I yeema  mi toosiaa nyɛdiaa le mi la huŋ dio nya Hemaŋ.’ Mɛɛ nda chii nyɛdiaa dio, mi Ɛsita dimul nda vɛlɛ le ma hiŋ diimandɔɔ le nyɛdiaa cheleŋ. Mɛɛ nda hiŋ diimandɔɔ ma wa nyɛdiaa dioo, mi masaa nyuna vɛlɛ Ɛsita aa: ‘Yɛɛnɛ ŋ yeema yɛ mi tosal num?’ Mi Ɛsita mulul ndu aa: ‘Waŋndo cho kindiŋndo le mbo dii ya a wanaa niaa. Yandii, chiindiaa naa fɔ.’ Mi Masaa nyuna ndu aa: ‘Nɛɛnɛ yeema yɛ nya diyɔɔ?’ Mi Ɛsita muli aa: ‘Laŋunɔ dɛnɛ wɔɔŋndo hoo, Hemaŋ.’ Mi Ahasaliɔɔ tuulu kɔl, nduyɛ o lepilɛ niŋ kpe, mbo tosa ma dii Hemaŋ.

Kɛ wana o wana ndoo tiuba mbo siŋga sawa Hemaŋ ndoo dɔu wo le, hali masaa bɛɛ. Le hei, mi masaa handu Mɔdikai buɛiyaa nduaa kpou bolleŋ, nduyɛ mbo ke ndu kpaayaa le mbo dɔu sawa sɛnɛi cheleŋ. Mi Mɔdikai duau sawa sɛnɛiyo. Ndu cho ni maa, te waŋnda del pɛ Chuuwa choo a sɔŋgɔɔ, Chuuwa nɔ dioo ma chiŋalaŋ wanaa kaŋ a sɔŋgɔɔ. A paŋgii Ada ve 13, mi Chuuwa yam yaamɔɔwaa ndaa. Chɔŋ niŋ a teleŋ koŋ, iwɔsi o iwɔsi, mi Chuuwa ndaa biilu paaleŋ ndeŋ.