Estere neli musizana wa Mujuda yanaapila mwa Peresia mwa muleneñi wa Shushani. Lilimo zeñata kwamulaho, lubasi lwahae neluzwisizwe mwa Jerusalema ki Nebukadenezare. Estere naahulisizwe ki kaizelaa hae Morodekai, mutangaa Mulena Asuerusi wa Peresia.

Mulena Asuerusi naabata musali yomunca wa kunyala. Batanga bahae bamutiseza basali babande hahulu ba mwa naha ili kukopanyeleza cwalo ni Estere. Kwa basali kaufela, mulena aketa Estere kuli abe muoli. Morodekai abulelela Estere kuli asike abulelela batu kuli ki Mujuda.

Muuna yaikuhumusa yabizwa Hamani neli yena yomuhulu kwa manduna kaufela. Naabata kuli mutu kaufela amukubamele. Morodekai ahana kueza cwalo, mi Hamani anyema hahulu kuli mane naabata kumubulaya. Hamani hanaazibile kuli Morodekai neli Mujuda, alela kubulaya Majuda kaufela mwa naha. Abulelela mulena kuli: ‘Majuda ki batu babamaswe hahulu, uswanela kubabulaya.’ Asuerusi ali: ‘Eza zeutokwa kueza kaufela,’ amufa maata a kutoma mulao. Hamani atoma mulao wa kuli batu babulaye Majuda kaufela mwa kweli ya Adara fa lizazi labu 13. Kono Jehova naabona zeneezahala kaufela.

Estere naasazibi kuli kunani mulao omunca one utomilwe. Kacwalo, Morodekai amulumela kopi ya mulao wo mi amubulelela kuli: ‘Uye uyo ambola ni mulena.’ Estere ali: ‘Mutu kaufela yaya ku mulena asika memiwa ukabulaiwa. Mi sekufitile mazazi a 30 nisa memiwi ki mulena! Kono nikaya. Haiba aniotololela mulamu wahae, nikapila. Kono haiba asaezi cwalo, uzibe nikashwa.’

Estere aya mwa lapa la mulena. Mulena hamubona, amuotololela mulamu wahae. Estere aya ku yena, mi mulena amubuza kuli: ‘Ki lika mañi zeubata kuli nikuezeze,  Estere?’ Kihaa li: ‘Nibata kumimemela kwa mukiti ni Hamani.’ Habali kwa mukiti, Estere abamema kuli bato fumaneha kwa mukiti wabubeli hape. Ka nako ya mukiti wabubeli, mulena hape abuza Estere kuli: ‘Ki lika mañi zeubata kuli nikuezeze?’ Estere aalaba ali: ‘Kunani mutu yabata kubulaya na ni bana bahesu kaufela. Shangwe, haku lupilise.’ Mulena amubuza kuli: ‘Ki mañi yabata kukubulaya?’ Estere ali: ‘Ki muuna yamaswe yo Hamani.’ Asuerusi ahalifa maswe kuli mane abulaya Hamani honafo feela.

Kono hakuna yanaakona kufelisa mulao wanaatomile Hamani, mane nihaiba mulena naasakoni kueza cwalo. Kacwalo, mulena abeya Morodekai kuba yomuhulu wa manduna mi amufa maata a kutoma mulao omunca. Morodekai aeza mulao one ukonisa Majuda kuitwanela hane bakatasezwa. Fa lizazi labu 13, mwa kweli ya Adara, Majuda batula lila zabona. Kuzwa feela ka nako yeo, Majuda ka silimo nebaezanga mukiti wa kuhupula lizazi leo.