Esta ne en Nya-Yahudi ma nodak e taon mar Shushan e piny Persia. Higni moko mang’eny ma ne osekalo, kwere Esta ne gin moko kuom joma Nebukadneza ne otero e tuech. Ne odongo e lwet owadgi ma bathe ma nyinge ne Mordekai, ma ne en jatich e od Ruoth Ahasuerus ma Persia.

Nitie kinde moro ma Ruoth Ahasuerus ne dwaro dhako manyien. Jotichne nokelone nyiri mabeyo beyo ma ne nitie e alwora mar Persia. Achiel kuom nyiri ma nokelgo ne en Esta. Kuom nyirigo duto, ruoth ne oyiero Esta. Mordekai ne onyiso Esta ni kik onyis ng’ato ang’ata ni en Nya-Yahudi.

Ne nitie ng’at moro ma bang’e ne oket jatelo e wi jodongo duto. Ng’atno ne nyinge Haman. Ne odwaro ni ji duto okulrene. Kata kamano, Mordekai to ne otamore kulorene. Mano ne omiyo Haman iye owang’ matek, kendo ne odwaro nego Mordekai. Ka ne Haman owinjo ni Mordekai ne en Ja-Yahudi, ne otimo chenro mar nego Jo-Yahudi te. Haman ne onyiso ruoth kama: ‘Jo-Yahudi gin joma richo ahinya; onego neggi te.’ Ahasuerus nonyiso Haman kama: ‘Tim kodgi kaka ineno ni berni.’ Kendo ne omiyo Haman teko mar loso chik ma nodwarono. Haman ne oloso chik ma ne nyiso ji mondo gineg Jo-Yahudi duto chieng’ tarik 13, e dwe mar Adar. Jehova ne neno gik ma ne timorego.

Esta ne ok ong’eyo ni ne oseket chik mar nego Jo-Yahudi te. Mordekai ne oorone kopi mar barua ma ne oting’o chikno, kendo nokwayo Esta kama: ‘Dhi mondo iwuo gi ruoth.’ Esta ne odwoko ni: ‘Ng’ato ang’ata ma odhi ir ruoth ka ruoth ok oluonge, inego. Ruoth pok oluonga ire kuom ndalo 30! Kata kamano, abiro dhi adhiya ire. Ka orieyona ludhe, ok bi nega. To ka ok otimo kamano, ng’e malong’o ni adhi tho.’

Esta nodhi ir ruoth. Ka ne ruoth onene, norieyone ludhe. Esta ne odhi but ruoth, kendo ruoth ne openje kama: ‘Esta, ang’o midwaro ni atimni?’ Esta ne odwoke kama:  ‘Daher rwaki kaachiel gi Haman e nyasi ma adhi loso.’ Ka ne gin e nyasino, Esta ne ochako orwakogi e nyasi machielo ma ne dhi bedo kinyne. E nyasi machielono, ruoth ne ochako openjo Esta ni: ‘Ang’o midwaro ni atimni?’ Esta ne owachone kama: ‘Nitiere ng’ato ma dwaro nega kaachiel gi ogandana. Kiyie to ireswa.’ Ruoth ne openjo Esta kama: ‘Mano to ng’a ma dwaro negino?’ Esta ne odwoke ni: ‘En Haman ng’at marachni.’ Mirima ne omako Ahasuerus mi ogolo chik mondo oneg Haman sano-sano.

Kata kamano, onge ng’ama ne nyalo loko chik ma ne Haman oketo mar nego Jo-Yahudi duto. Kata mana ruoth ne ok nyal loko chikno. Omiyo, ruoth ne oketo Mordekai mondo obed jatelo e wi jodongo duto, mi omiye teko mar loso chik machielo manyien. Mordekai ne oloso chik ma ne oyie ne Jo-Yahudi kedo gi joma ne dhi monjogi chieng’ tarik 13, dwe mar Adar. Ka ne chieng’no ochopo, Jo-Yahudi ne oloyo jowasikgi. Chakre kanyo ka dhi nyime, ne gitimoga nyasi mar paro odiechieng’no higa ka higa.