Tzmatoq txin Ester ex in nanqʼintoq toj jun tnam te Persia aju Susa tbʼi. Otoqxi tzikʼ nim abʼqʼi tponlen aj kawil Nabucodonosor qʼil qe toj tja toj Jerusalén. A Mardoqueo jaw chʼiysante aju tprim, aju toktoq te tmajen aj kawil Asuero te tnam Persia.

Tajtoq aj kawil Asuero jun akʼaj xuʼj aj kawil. Kyjuʼtzun e pon kyiʼn tmajen aʼyeju xuʼj tbʼanelxix che keʼyin ateʼ toj tnam, ex a Ester jun kyxol qe jlu. Kyxol kykyaqil xuʼj, jaw tjyoʼn Asuero Ester tuʼn tok te aj kawil. Xi tqʼamaʼn Mardoqueo te Ester tuʼn miʼn t-xi tqʼamaʼn te alkyexku qa aj Judiy te.

Attoq jun xjal in jawtoq tnimsan tibʼ aju Hamán tbʼi, mas nimtoq toklen kyxol nejenel. Tajtoq tuʼn kykubʼ mokʼeʼ kykyaqil xjal twitz. Noqtzun tuʼnj, mintiʼtoq in kubʼ mokʼeʼ Mardoqueo twitz. Tzajxix tqʼoj Hamán tiʼj axpe ikx tajtoq tuʼn tkubʼ tbʼyoʼn. Tej tok tbʼiʼn Hamán qa aj Judiy Mardoqueo, ul toj t-ximbʼetz tuʼn kykubʼ tbʼyoʼn kykyaqil qe aj Judiy. Xi tqʼamaʼn te aj kawil: «Jaku tzʼok kybʼinchaʼn aj Judiy nya bʼaʼn qiʼj. Il tiʼj tuʼn kykubʼ bʼiyet kykyaqil». Tzaj ttzaqʼweʼn Asuero te: «Bʼinchama aju mas bʼaʼn toj twitza». Ex xi tqʼoʼn ambʼil te tuʼn tkubʼ ttzʼibʼin jun kawbʼil. Aju kawbʼil lu in tzajtoq tqʼamaʼn qa toj 13 te t-xjawil adar iltoq tiʼj tuʼn kykubʼ bʼyet qe aj Judiy. Noqtzun tuʼnj, ojtzqiʼntoq tkyaqil jlu tuʼn Jehová.

Mintiʼtoq ojtzqiʼn kawbʼil lu tuʼn Ester. Tuʼntzunju, xi tsamaʼn Mardoqueo jun tilbʼilal kawbʼil lu te ex xi tqʼamaʼn te: «Il tiʼj tuʼn tyolina tukʼil aj kawil». Xi ttzaqʼweʼn Ester: «Noq alkyexku ma txiʼ twitz aj kawil ex mintiʼ ma tzaj qʼoʼn jun txokbʼil te il tiʼj tuʼn tkyim. Ex ma tzʼel 30 qʼij mintiʼxixtl in chin tzaj txkoʼne tuʼn aj kawil. Noqtzun tuʼnj chin xeʼle. Qa ma tzaj tnuqpiʼn aj kawil ttzeʼ wiʼje, ok chin anqʼile. Qatzun mintiʼ, ok chin kyimele».

Xiʼ Ester twi tpeʼn tja aj kawil. Tej tok tkeʼyin aj kawil Ester xi tnuqpiʼn ttzeʼ twitz. Xi laqʼeʼ chʼintl Ester ex tzaj tqanin aj kawil te: «¿Tiʼ taja Ester?». Xi ttzaqʼweʼn:  «Waje tuʼn ttzaja tukʼix Hamán waʼl tuʼnju kbʼantel jun tbʼanelxix wabʼj wuʼne». Tej in che waʼntoq, e tzaj ttxkoʼn Ester juntl maj waʼl. Toj tkabʼ maj tej kywaʼn, tzaj tqanin juntl maj aj kawil te Ester: «¿Tiʼxix taja?». Xi tqʼamaʼn: «At jun xjal taj tuʼn tkubʼ bʼyonte weye kyukʼix nxjalile. Bʼinchama xtalbʼil, qo tkloma». Xitzun tqanin aj kawil: «¿Alkye xjal taj tuʼn tkubʼ bʼyoʼne tuʼn?». Xi ttzaqʼweʼn: «Aju xjal nya bʼaʼn lu, a Hamán». Tzajxix tqʼoj Asuero, tuʼntzunju xi tqʼamaʼn tuʼn tkubʼ bʼyoʼn naj Hamán.

Noqtzun tuʼnj, mix aʼltoq jaku kubʼ najsante kawbʼil otoq kubʼ ttzʼibʼin Hamán, nix aj kawil. Tuʼntzunju ok tqʼoʼn aj kawil toklen Mardoqueo tuʼn tkubʼ nej kywitz qe nejenel ex xi tqʼoʼn ambʼil te tuʼn tkubʼ ttzʼibʼin jun akʼaj kawbʼil. In tzajtoq tqʼamaʼn kawbʼil lu qa jakutoq che kolin aj Judiy kyibʼ aj kyok lipen aj qʼoj kyiʼj. Toj qʼij 13 te t-xjawil adar, kubʼ kyiʼj aj qʼoj kyuʼn aj Judiy. Atxix toj qʼij aju, xi tzyet tuʼn tkubʼ kyikʼsaʼn aj Judiy aju kambʼabʼil lu toj tkyaqil abʼqʼi.