Esita wali umukazyana Umuyuda uwikalanga umu musumba uwa Susa umu Pesya. Imyaka ingi uku cisila, Nebukadineza wasenzile ya lupwa yakwe Esita ukufuma uku Yelusalemu. Modekai umuomvi uwa Mwene Aasuwelo uwa ku Pesya uwamukuzizye.

Umwene Aasuwelo walondanga ukutwala namwene muze. Aomvi yakwe yamulondiile akazyana asuma sana aa mu mpanga yakwe ukwikako sile na Esita. Pa yanaci yonsi yano yalonzile, umwene wasoolwile Esita ukuya namwene. Modekai waneenyile Esita ukuti ataalinzile ukusokolola ukuti Umuyuda.

Umonsi uwa cilumba Hamani u watungululanga ya cilolo yonsi. Fwandi walondanga ukuti antu yonsi yamufukamila. Nomba Modekai wene atamufukamilanga, fwandi Hamani wasosile sana icakuti walondanga ukumukoma. Lino Hamani wamanyile ukuti Modekai Umuyuda, wapingwilepo ukukoma Ayuda yonsi. Waneenyile umwene ati: ‘Ayuda antu aipe sana, ulinzile ukuyakoma yonsi.’ Aasuwelo watiile: ‘Ucite iciliconsi cino ukulonda,’ nupya wamupeezile amaka akupanga isunde ilyakuti Ayuda yonsi yakomwe. Hamani wisileko isunde ilyakuti Ayuda yonsi yalinzile ukukomwa pa wanda uwalenga 13 umu mwezi wa Adali. Yeova walolanga ivyacitikanga.

Esita atamanyile ukuti kwali isunde ilya kukoma Ayuda. Fwandi Modekai wamupeezile apalemvilwe isunde lii nu kumuneena ati: ‘Ukalanzyanye nu mwene api sunde lii.’ Esita watiile; ‘Ndi cakuti umwi waya uku mwene ukwaula ukwamwa ali nu kukomwa. Nupya papita amanda 30 umwene ataatala wangama. Lelo, nimayako. Ndi cakuti waya wansonta ni ntuwa ale ntakukomwa. Ndi cakuti atacisile vivyo nimakomwa.’

Esita waile ukwi sano ilya mwene. Lino umwene wamuweni, wamusonsile ni intuwa. Lyene Esita wapalamile, umwene  nawe amuzya ati: ‘I cani cino ukulonda nkucitile?’ Esita watiile: ‘Nkulonda mukize na Hamani uku mutebeto.’ Pa nsita ino yaali pa mutebeto, Esita wayamile uku mutebeto na uze. Nupya pa mutebeto kwene uu wakwe ciili, umwene uzizye Esita nupya kwene ati: ‘I cani cino ukulonda nkucitile?’ Nawe watiile: ‘Kuli umwi aakulonda ukunkoma kumwi na antu yane. Napaapata tupususye.’ Umwene uzizye ati: ‘Aweni aakulonda ukumikoma?’ Nawe watiile: ‘Umuntu wii umwipe Hamani.’ Aasuwelo wasosile sana icakuti wapingwilepo ukuti Hamani akomwe papo kwene.

Lelo kutali uwakufumyapo isunde lino Hamani wisileko, kumwi sile nu mwene. Fwandi umwene wapeezile Modekai umulimo uwa kwangalila ya cilolo nu kumupeela amaka aakupanga isunde ilipya. Modekai wapanzile isunde ilyakuzumilizya Ayuda ukuicingilila ndi cakuti yazanzwa. Pa wanda uwalenga 13 umu mwezi uwa Adali, Ayuda yacimvizye alwani yao yonsi. Kufuma lili kwene, Ayuda yaatandike ukukwata ukuzevya cila mwaka pa wanda uno yacimvizye.