Ester ear juon RiJu im ear jokwe ilo jikin eo etan Shushan ilo Põrsia. Elõñ iiõ m̦oktal̦o̦k, Nebukadnezar ear bõk ro jibwin im jim̦m̦aan Ester jãn ijo jikier ilo Jerusalem. Em̦m̦aan eo naaj jein Ester etan Mordikeai ear lale im kaajjiririiki. Mordikeai ear juon rijerbal ñan Kiiñ Ehasuirõs, kiiñ in Põrsia.

Kiiñ Ehasuirõs ear kõn̦aan bwe en wõr bar juon lerooj kããl. Rijerbal ro an rar bõktok ñan ippãn jiroñ ro redeo̦ tata ilo ãneo ekoba Ester. Iaan aolep jiroñ rein, kiiñ eo ear kããlõt Ester bwe en lerooj. Ak Mordikeai ear jiroñ Ester bwe en jab kwal̦o̦k ñan ro jet ke e juon RiJu.

Em̦m̦aan eo etan Heman im ear tõl aolep ruutiej ro, ear juon eo eutiej bũruon. Ear kõn̦aan bwe aolep ren badikdik ñane, ak Mordikeai ear m̦akoko. Kõn men in, Heman ear lukkuun illu, joñan ear kõn̦aan m̦ane. Innem, ke Heman ear roñ ke Mordikeai kar juon RiJu, ear kõm̦m̦ane juon pepe ñan m̦an aolep Riju ro ilo ãneo. Ear ba ñan kiiñ eo: ‘RiJu rein rej armej nana, kwõj aikuj jol̦o̦k er.’ Kiiñ eo ear ba: ‘Kõm̦m̦an jabdewõt men kwõj aikuj kõm̦m̦ane,’ im ear lel̦o̦k maroñ ñane bwe en kõm̦m̦ane juon kien. Innem Heman ear kõm̦m̦ane juon kien ñan armej ro bwe ren m̦an aolep RiJu ro ilo 13 raanin allõñ in Adar. Ak Jeova ear reilal̦tak im loe an men kein wal̦o̦k.

Ester ear jaje kõn kien in. Kõn men in, Mordikeai ear jilkinl̦o̦k ñane kõjjel̦ã eo kõn kakien in im ear ba ñane: ‘Etal im kõnnaan ippãn kiiñ en̦.’ Im Ester ear ba: ‘Jabdewõt eo ej etal ñan ippãn kiiñ en̦ ak ear jab kũri, enaaj mej. Kiiñ en̦ ejjañin kũrl̦o̦k ña ñan ippãn ium̦win 30 de raan! Ak inaaj etal. El̦aññe enaaj erl̦o̦ke jokon̦ en̦ an, inaaj mour wõt, el̦aññe ejjab, inaaj mej.’

Ester ear etal ñan ijo jikin kiiñ eo. Ke kiiñ eo ear loe, ear erl̦o̦ke jokon̦ eo an. Kõn men in, Ester ear etal ñan ippãn, im kiiñ eo ear kajjitõk im ba: ‘Ta eo kokõn̦aan  bwe in jipañ eok kake, Ester?’ Im ear uwaak im ba: ‘Ikõn̦aan kũrtok komiro Heman ñan juon iien m̦õñã.’ Innem ilo iien m̦õñã eo, Ester ear bar kũr erro ñan bar juon iien m̦õñã ilo raan eo tok juon. Im ilo iien m̦õñã in kein karuo, kiiñ eo ear bar kajjitõk: ‘Ta eo kokõn̦aan bwe in jipañ eok kake?’ Ester ear ba: ‘Juon en̦ ej pojakin m̦an ña im armejin aelõñ en̦ aõ. Jouj im lo̦mo̦o̦ren kõm.’ Kiiñ eo ear kajjitõk: ‘Wõn en̦ ekõn̦aan m̦an kwe?’ Ear ba: ‘Em̦m̦aan n̦e enana Heman.’ Ehasuirõs ear lukkuun illu, joñan ear ba bwe ren m̦õkaj im m̦an Heman ñan mej.

Ak ejjel̦o̦k emaroñ jol̦o̦ke kien eo Heman ear kõm̦m̦ane, ekoba kiiñ eo. Kõn men in, kiiñ eo ear kããlõt Mordikeai bwe en tõl ruutiej ro im lel̦o̦k maroñ ñane bwe en kõm̦m̦ane juon kien kããl. Mordikeai ear kõm̦m̦ane juon kien me ej kõtl̦o̦k an RiJu ro lo̦mo̦o̦ren er make jãn ro rej tarin̦aeik er. Ilo 13 raanin Adar, RiJu ro rar anjo̦ ioon rũkõjdat ro. Jãn iien in m̦aanl̦o̦k, kajjojo iiõ rej keememeje iien in rar bõk anjo̦.