Ester eliyaya se ichpokatl judía katli itstoya ne Persia ipan altepetl Susa pampa Nabucodonosor kinkixtijtoya ichampoyouaj tlen Jerusalén. Mardoqueo kiiskaltik Ester. Ya eliyaya imachikni uan kitekipanouayaya tlanauatijketl Asuero ipan Persia.

Tlanauatijketl Asuero kitemojtinemiyaya seyok siuatlanauatijketl. Yeka itekipanojkauaj kintlapejpenijkej ichpokamej katli tlauel yejyektsitsij ipan nochi nopa altepetl, uan Ester nojkia kitlapejpenijkej. Asuero kitlapejpenik Ester ma eli siuatlanauatijketl. Mardoqueo kiiljuik Ester amo ma kiijto eliyaya judía.

Itstoya se tlakatl katli tlauel moueyimatiyaya, motokaxtiyaya Amán. Kitekimakatoyaj ma kinyakana sekinok tlayakananij. Maske kinekiyaya nochi ma motlankuaketsakaj iixpa, Mardoqueo amo kichiuayaya, yeka tlauel kualanki uan kinejki kimiktis. Kema Amán kimatki Mardoqueo eliyaya judío, kitemolik kenijkatsa kinmiktis nochi judíos katli itstoyaj ipan nopa tlali. Yeka kiiljuito Asuero: “Ne judíos tlauel amo kualmej. Moneki tikinmiktisej”. Asuero kiiljuik: “Xijchiua tlen tikita kinamiki”. Uan kikauilik ma kichiua se tlanauatili kampa kiijtouayaya ipan tonali 13, metstli adar, kinmiktiskiaj judíos. Jehová kiitayaya nochi tlen panoyaya.

Ester amo tleno kimatiyaya. Yeka Mardoqueo kititlanilik se amatl kampa kiixkopintoyaj nopa tlanauatili, uan kiiljuik: “Moneki timonojnotsas iuaya nopa tlanauatijketl”. Ester kinankilik: “Tlaj se akajya kiitati nopa tlanauatijketl uan ya amo kinotstok, kimiktisej. Maske kipia 30 tonali amo nechnotstok, nias nikitati. Tlaj nopa tlanauatijketl kitlalanas ikua, amo tleno nechpanos. Uan tlaj amo, nechmiktisej”.

Ester yajki kampa itstoya nopa tlanauatijketl. Kema Asuero kiitak, kitlalanki ikua tlen kichijchijtoyaj ika oro. Ester monechkauik uan nopa tlanauatijketl kitlajtlanilik: “¿Tlake tijneki Ester?”. Ya kinankilik: “Nijchiuas se ueyi tlakualistli uan nijneki  xitlakuati iuaya Amán”. Kema tlakuayayaj, Ester kintlanejki ipan seyok tlakualistli tlen kichiuaskia. Ualmostla kema tlakuayayaj, Asuero sampa kitlajtlanilik Ester: “Xinechiljui, ¿tlake tijneki?”. Ester kiiljuik: “Se akajya kineki nechmiktis uan kineki kinmiktis katli euaj ipan noaltepe. Nimitstlajtlania, xitechmanaui”. Asuero kitlajtlanilik: “¿Ajkia kineki mitsmiktis?”. Ya kiiljuik: “Ni amo kuali tlakatl Amán”. Asuero tlauel kualanki uan tlanauatik ma kimiktikaj Amán.

Amo aka ueliyaya kipatla nopa tlanauatili tlen kichijtoya Amán, yon nopa tlanauatijketl ueliyaya kipatla. Yeka Asuero kitekimakak Mardoqueo ma kinyakana tlayakananij, uan kikajki ma kichiua se yankuik tlanauatili kampa kiijtouayaya judíos ueliskiaj momanauisej kema kinteuiskiaj. Ipan tonali 13, metstli adar, nopa judíos kintlankej ininkualankaitakauaj. Yeka nopa judíos pejkej iljuichiuaj sejse xiuitl ipan nopa tonali kema tlatlankej.