Ester okatka se ichpochtli judía tlen ochantiaya altepetl Susa, nin okatka itech ueyi altepetl Persia. Miak xiuitl achto, ueyi tekiua Nabucodonosor okinkixti ikalchanejkauan Ester itech altepetl Jerusalén. Mardoqueo okatka iprimo Ester uan ye okiskalti. Mardoqueo okitekichiuiliaya ueyi tekiua persa tlen omotokayotiaya Asuero.

Ueyi tekiua Asuero okinekiaya se yankuik siuatl ueyi tekiua. Ik non, itlakeualuan okiuikilijkej siuamej tlen okachi kuajkualtsitsintin uan noijki okiuikakej Ester. Asuero okipejpenki Ester para yetoskia siuatl ueyi tekiua. Mardoqueo okilui Ester amo ikaj ma kilui ye okatka judía.

Se tlakatl tlen omotokayotiaya Hamán omoueyinekiaya uan okinyekanaya príncipes. Ye okinekiaya nochtin ixpan ma motlankuaketsakan. Pero Mardoqueo amo okichiuaya. Hamán sapanoa okualanki uan okinekiaya kimiktis. Ijkuak Hamán okimatki Mardoqueo okatka Judío, omokuayejyeko ken kinmiktiskiaj nochtin judíos tlen okatkaj itech nochi ueyi altepetl. Okiluito ueyi tekiua Asuero: “Judíos amo yolkualmej. Moneki nochtin ma tikinmiktikan”. Asuero okinankili: “Xikchiua tlen timokuayejyekoa kuali yetos”. Uan okikauili ma kichiua se tlanauatil. Nin tlanauatil okijtoaya itech tonal 13, metstli adar, kinmiktiskiaj nochtin judíos. Pero Jehová okimatiaya tlen opanotoka.

Ester amo okimatiaya kox okatka non tlanauatil. Ik non, Mardoqueo okititlanili se copia uan okilui: “Ximotlapouiti iuan ueyi tekiua”. Ester okinankili: “Kimiktiskej akin yas ixpan ueyi tekiua tla ye amo kinotsa. Yikipia 30 tonalmej ueyi tekiua amo kijtoa ma nikitati. Pero nias. Tla ye noixpan kimelauas ima kanin kipia itlako, niyoltos. Pero nechmiktiskej tla amo ijkon kichiuas”.

Ester okitato ueyi tekiua uan omoka kiauak. Ijkuak ueyi tekiua okitak,  okimela ima kanin okipiaya itlako ixpan Ester. Ye omotoki uan ueyi tekiua okitlajtlani: “Ester, ¿tlen tikneki?”. Ester okinankili: “Namechyoleua xitlakuatij te uan Hamán”. Ijkuak otlakuajtokaj, Ester oksepa okinyole mostlatika ma tlakuatij. Ijkuak oksepa otlakuajtokaj, ueyi tekiua oksepa okitlajtlani Ester: “¿Tlen tikneki?”. Ye okinankili: “Se tlakatl kineki nechmiktis uan noijki kineki kinmiktis akinmej pouij itech noaltepe. Nimitstlatlaujtia, techmakixti”. Ueyi tekiua Asuero okitlajtlani: “¿Akin kineki mitsmiktis?”. Ester okinankili: “Nin tlakatl amo yolkuali tlen itoka Hamán”. Asuero sapanoa okualanki uan san niman otlanauati ma kimiktikan Hamán.

Pero nion ueyi tekiua uelis kipojpoloskia tlanauatil tlen okichi Hamán. Ik non, Asuero okilui Mardoqueo ma kinyekana príncipes uan okikauili ma kichiua se yankuik tlanauatil. Non tlanauatil okijtoaya judíos uelis mopaleuiskiaj ijkuak kinteuiskiaj. Itech tonal 13, metstli adar, judíos okintlanilijkej akinmej okinkokoliayaj. Non tonal, judíos opejkej iluichiuaj sejse xiuitl para kilnamikiskiaj ken otlatlankej.