Esteri wainga musikane wo ciJudha waigara ku Persia mu dhorobha raidanwa Susa. Makore akawanda izvi zvicito zvaitika, majicekuru ake ainga akatohwa ku Jerusarema ndi mambo Nebhukadhinezari. Iyena wakarehwa ndi nyavanji wake Mordhekai, uwo waishandira Mambo Asuero wo ku Persia.

Mambo Asuero vaida vahosi vapsa. Vashandi vake vakamuviisira vasikane vese vakanyara maningi vo munyika iya, kubatanija na Esteri. Kunja ko vasikane vese, mambo wakasana Esteri kuti ave vahosi. Mordhekai wakabvunja Esteri kuti atame kunanga kuti wainga muJudha.

Umwe mwanarume waizvikuja waidanijwa Amani wainga nduna yo vatungamiriri vese. Iyena waida kuti vese vamungwadamire. Asi Mordhekai wakaramba kuita zvondhozvo, Amani wakanyagajwa maningi zve wakada kuuraya Mordhekai. Amani paakaziva kuti Mordhekai wainga mu Judha, iyena wakaita urongwa wo kuuraya vaJudha vese vainga mu nyika. Iyena wakabvunja mambo kuti: ‘VaJudha i vandhu vakashata maningi, munodikana kuvapeja vese.’ Asuero wakati: ‘Itai zvese zvaunoda kuita,’ perapo, wakamupa simba ro kuita mutemo. Amani wakatara mutemo waibvunja vandhu kuti vauraye vaJudha vese mu njiku 13 mu mweji wa Adhari. Jehovha waizvivona.

Esteri apana caiziva ngo pamusoro po mutemo wondhowo. Asi Mordhekai wakamutumira khopi zve womubvunja kuti: ‘Endai zve bvunjai mambo.’ Esteri wakati: ‘Ari wese anopinda kuna mambo acizivi kudaniwa anourawa. Ndino mazuva anokwana 30 ndicito ndadaniwa! Asi ndinoenda. Kudari akandimusira ngori yake, ndinopona. Asi kudari akatama kumusa, ndinouraiwa.’

Esteri wakaenda ku civanje cainga na Mambo. Mambo paakamuvona, wakamusa ngori kana ndonga yake. Esteri wakaenda  kwaari, zve mambo wakati: ‘Zvicinyi zvandigakuitira, Esteri?’ Iyena wakati: ‘Ndinoda kukoka imwimwi na Amani ku mabuso.’ Pavainga vecibusa, Esteri wakaitazve mukoka wo cipiri ku mabuso amweni. Paainga eciitwa mabuso o cipiri, mambo wakabvunjisazve kuti: ‘Zvicinyi zvadingakuitira?’ Iyena wakati: ‘Kuno mundhu anoda kudiuraya pomwe no vandhu vangu. Ndapota tiponesei.’ Mambo wakabvunjisa kuti: ‘Ndiani anoda kukuuraya?’ Esteri wakati: ‘Ndi mwanarume uu wakashata Amani.’ Asuero wakacamwa maningi zvokuti wakaita kuti Amani auraiwe pa nguva yondhoyo.

Asi akuna waikwanisa kupeja mutemo wakatahwa ndi Amani, pikija mambo. Ngo kudaro mambo wakaita kuti Mordhekai ave nduna yo vatungamiriri zve wakamubvunja kuti aiite mutemo umweni. Mordhekai wakatara mutemo waiita kuti vaJudha vajijivirire kudari ari wese akaeja kuvahwisa. Muna 13 wa Adhari, vaJudha vakanyisa vavengi vavo. Ngo ndava yazvo, ivona vanoceukija njiku iyi gore ngo gore.