Ester ankho omuhikuena umwe omu Judeu ankho ukala mo Persia mepunda-umbo lio Susan. Tunde apa Nambukondonosole apola ombunga yae mo Jelusalei ankho palambale omanima omanyingi. Ester ankho ukala na tyepwa tyae Mordekai, omuundapi Wohamba Asueru wo ko Persia.

Ohamba Asueru ankho uhanda onkhai-hamba onkhuavo. Ovaumbili vae avemuetela ovahikuena ovawa vo motyilongo otyo, umwe puvo o Ester. Po vahikuena ovo aveho, ohamba aikoyo-po Ester akale onkhai hamba. Mordekai atolela Ester opo ahapopie okuti omu Judeu.

Omulume ankho utumina vakuavo, omunthu umwe ulipakako unene utiwa o Hamaa. Ankho uhanda tyina ovanthu aveho vemumona vaikila konongolo. Mordekai aanye okutyilinga, iya Hamaa anumana unene ahande okumuipaa. Etyi Hamaa etyinoñgonoka okuti Mordekai omu Judeu, alingi omphango yo kuipaa ova Judeu aveho vo motyilongo omo. Atolela ohamba okuti: ‘Ova Judeu ovakalavi ove wesukisa okuliyakulila kuvo.’ Asueru ati: ‘Linga etyi uhanda,’ apakeko otyitumino tyimwe. Hamaa apake otyitumino tyipopila ovanthu opo vaipae ova Judeu aveho monthiki ya 13 yohanyi ya Adar. Jeova ankho utyiete.

Ester ankho kei otyitumino otyo. Mordekai atumu omukanda muna otyitumino otyo ku Ester, tupu emupopila okuti: ‘Enda kapopie nohamba.’ Ester apopi okuti: ‘Omunthu wenda kohamba tyahaihanenwe upondola okuipawa. Ame ndyina ononthiki 30 otyo nahaihanwa nohamba! Mahi mandyendeko. Inkha utandaveka otyimuti tyae, mandyihupu. Inkha katandaveka, ame mandyinkhi.’

Ester aende keumbo lio hamba. Etyi ohamba yemumona aitandaveka otyimuti. Iya aimupulu okuti: ‘Oityi uhanda ndyikulingile, Ester?’ Ester apopi okuti: ‘Ame nahanda okukonga ove na Hamaa opo muye kotyipito.’ Etyi otyipito otyo tyapwa, Ester evekongo vali veye kotyipito otyikuavo. Motyipito tyavali,  ohamba aimupulu vali okuti: ‘Oityi uhanda nkhulingile?’ Ester ati: ‘Pena omunthu uhanda okundyipaa kumwe novanthu vange. Mbambavo tuyovole.’ Ohamba aimupulu okuti: ‘Olie uhanda okumuipaa?’ Ester ati: ‘Omulume ou, ondingavivi Hamaa.’ Asueru anumana unene atumu Hamaa aipawe.

Mahi ankho petupu omunthu upondola okupilulula otyitumino tya Hamaa, alo umwe ohamba kaipondola okutyilinga. Ohamba ailingi Mordekai omutumini iya aimuavela epondolo lio kulinga otyitumino otyipe. Mordekai apakeko otyitumino opo ova Judeu veliyakulile tyina valuiswa. Monthiki ya 13 yo Adar, ova Judeu avafindi onondyale mbavo. Okutuka opo, mokueenda kuomanima omanyingi ova Judeu ankho valinga otyipito tyokuhinangela eyovo olio.