Ester wia eene judische Mejal von eene Famielje, waut Nebukadnezar Joaren trigj mol von Jerusalem metjenomen haud. See wond en de Staut Susa en Persien. Ester äa Vada Mordechai haud ar hanjenomen. Hee wia dän persischen Kjennich Ahasveros sien Deena.

De Kjennich Ahasveros wull eene fresche Kjennijin. Siene Deena brochten dän de schmokste Mejalen em Launt. Ester wia doa uk mank. Von aul dee läsd de Kjennich sikj Ester ut aus Kjennijin. Mordechai säd, Ester sull daut nich sajen, daut see eene judische Mejal wia.

Haman, een stolta Maun, wia de Bowaschta von aule Rejierungsmana. Dee wull, daut aule sikj ver am bekjen sullen. Mordechai deed daut nich. Haman wort soo doll, daut dee dän dootmoaken wull. Aus hee enwort, daut Mordechai een Jud wia, tald hee sikj äwa, aule Juden em Launt doottomoaken. Hee säd toom Kjennich: “De Juden sent eene Jefoa. Moak die loos von dee.” Ahasveros säd: “Doo, waut doa fält.” Hee jeef Haman de Frieheit, een Jesaz to moaken. Haman muak dan een Jesaz, daut se dän 13. Dach en de Adar-Moonat aule Juden dootmoaken sullen. Jehova sach daut, waut doa aunjinkj.

Ester wist nuscht von dit Jesaz. Mordechai schekjt dee eene Aufschreft von daut Jesaz un säd: “Go un räd met dän Kjennich.” Ester säd: “Jieda eena, waut onen jekroacht nom Kjennich jeit, woat dootjemoakt. De Kjennich haft mie aul 30 Doag nich sajen loten! Oba ekj woa gonen. Wan dee mie dän Kjennichsstock hanhelt, dan bliew ekj läwen. Wan nich, dan mott ekj stoawen.”

Ester jinkj nom Kjennich. Aus dee ar sach, hilt dee ar dän Kjennichsstock han. Ester jinkj dichta biea, un hee fruach: “Waut kaun ekj fa die doonen, Ester?” See säd: “Ekj well die un Haman to eene  besondre Moltiet kroagen.” Aus dee bie Ester wieren, kroagd see dee noch eemol. Bie dee Moltiet fruach de Kjennich wada: “Waut kaun ekj fa die doonen?” See säd: “Mie un mien Volkj wellen se dootmoaken. Rad ons toom Jefaulen.” De Kjennich fruach: “Wäa well junt dootmoaken?” See säd: “Dis schlajchta Haman.” Ahasveros wia soo doll, daut hee Haman fuaz leet dootmoaken.

Oba kjeena kunn Haman sien Jesaz aufmoaken, nich mol de Kjennich. Doawäajen muak de Kjennich Mordechai toom Bowaschten von de Rejierungsmana un jeef dän de Frieheit, een freschet Jesaz to moaken. Mordechai muak dan een Jesaz, daut de Juden sikj wäaren kunnen, wan äare Fiend ieescht wudden aunkomen. Dän 13. Adar kjeemen dee un de Juden kunnen dee jewennen. Von dan aun muaken de Juden jieda Joa een Fast toom daut em Denkj hoolen.