Sipas Esterqa judía karqa, Persia suyoj Susa llajtanpitaj tiyakorqa. Paytaqa primon Mardoqueo uywakorqa. Mardoqueotaj Persiamanta rey Asueroj kamachin karqa.

Rey Asueroqa waj reinatañataj ajllayta munaspa, Persiamanta kʼachita warmista kamachina wasinman pusacherqa. Paykuna ukhumantataj Esterta reina kananpaj ajllarqa. Chayrayku Mardoqueo Esterman nerqa: “Ni piman willankichu judía kasqaykita”, nispa.

Amán sutiyoj runaqa reypa kuraj kamachin karqa, maytataj jatunchakoj. Munajtaj tukuy runas payman kʼumuykukunankuta. Mardoqueo payman mana kʼumuykukojtintaj mayta phiñakorqa, wañuchiytataj munarqa. Amanqa Mardoqueo judío kasqanta yachaytawan, judiosta wañuchiyta munaspa reyman nerqa: “Judiosqa mana kasusunkuchu, tukuyninkuta wañuchina”, nispa. Reytaj nerqa: “Nisqaykiman jina ruway”, nispa. Chantá uj leyta orqhonanpaj Amanman permisota qorqa. Chay leypitaj nerqa Adar killamanta 13 pʼunchaypi judiosta wañuchinankuta. Jehová Diostaj chayta qhawasharqa.

Esterqa mana chay leymanta yacharqachu. Chayrayku Mardoqueo chay leymanta uj copiata payman apacherqa, nerqataj reywan parlamunanta. Estertaj nerqa: “Pillapis reypaman mana wajyarisqalla yaykojqa wañuchisqa kanan tiyan. Noqarí 30 diasña mana wajyachisqachu kani. Jinapis risaj. Rey qorimanta tojnunta jaywarillawajtin salvakusaj”, nispa.

Esterqa reypaman rerqa. Reytaj payman qorimanta tojnunta jaywarerqa. Ester qayllaykojtintaj nerqa: “¿Imatataj munanki Ester?”, nispa. Estertaj nerqa: “Jatun mikhuyta wakichisqayman  Amanwan jamunaykita”, nispa. Chayman rejtinkutaj waj mikhuymanñataj paykunata wajyarerqa. Chay qhepa mikhuypitaj reyqa Esterta ujtawan nerqa: “¿Imatataj munanki?”, nispa. Estertaj nerqa: “Uj runa llajta masisniyta, noqatawan wañuchiyta munawayku. Yanapariwayku ari”, nispa. Reytaj nerqa: “¿Pitaj chay runari?”, nispa. Estertaj nerqa: “Chay runaqa kay Amán”, nispa. Reytaj mayta phiñakuspa, chay rato nerqa Amanta wañuchinankuta.

Jinapis Amanpa orqhosqan leytaqa ni reypis cambiayta aterqachu. Chayrayku reyqa Mardoqueota kuraj kamachin kanapaj churarqa, atiytataj qorqa uj leyta orqhonanpaj. Chay leypeqa nerqa judíos enemigosninkumanta jarkʼakunankuta. 13 de adarpitaj judiosqa enemigosninkuta atiparqanku. Chay diamantapachataj chay pʼunchayta sapa wata yuyarikorqanku.