Ester are jun ali judía che kʼo pa jun tinamit re Persia ubʼiʼ Susa. Kʼi junabʼ nabʼe kanoq, ri ajawinel Nabucodonosor xresaj bʼi ri ufamilia pa Jerusalén. Are ri uprimo Mardoqueo xkʼiyisanik, che are rajchak ri ajawinel Asuero rech Persia.

Ri ajawinel Asuero kraj chi jun kʼakʼ ajawinel ixoq. Rumal laʼ ri rajpatanelabʼ xkikʼam bʼi chuwach ri ixoqibʼ che más e utz kekaʼyik che e kʼo pa ri tinamit, Ester are jun chke. Chke konojel ri ixoqibʼ, ri ajawinel xuchaʼ ri Ester rech kux ri ajawinel ixoq. Mardoqueo xubʼij che Ester che kʼo ta che nijun kubʼij wi che judía.

Jun achi che sibʼalaj kubʼan nimal ubʼiʼ Hamán are ri kkʼamow kibʼe konojel ri príncipes. Areʼ kraj che konojel kexukiʼ chuwach. Are kʼu Mardoqueo kxukiʼ taj. Hamán sibʼalaj xpe royowal, kraj kukamisaj. Are chiʼ Hamán xretaʼmaj che Mardoqueo are judío, xchoman chrij jun jastaq rech keʼukamisaj konojel ri judíos rech ri tinamit. Xubʼij che ri ajawinel: «Ri judíos kekunik kkibʼan kʼax. Rajawaxik che konojel kekamisaxik». Ri Asuero xubʼij: «Chabʼanaʼ ri kachomaj che are ri utz». Tekʼuriʼ xubʼij che, che kkunik kubʼan jun taqanik. Wajun taqanik riʼ kubʼij che pa ri qʼij 13 rech ri ikʼ adar rajawaxik che ri winaq kekikamisaj ri judíos. Are kʼu ri Jehová tajin kril ronojel.

Ester retaʼm ta chrij ri taqanik. Rumal laʼ Mardoqueo xutaq jun wuj che Ester che xubʼij: «Rajawaxik katchʼaw rukʼ ri ajawinel». Ester xubʼij: «Ronojel ri kopan rukʼ ri ajawinel che sikʼim ta rumal kkamisaxik. Xuqujeʼ qʼaxinaq chi 30 qʼij che in nusikʼim taj. Are kʼu kinbʼek. We kulikʼ ri uchʼamiʼy chnuwach, kinkʼasiʼ riʼ. Are kʼu we kubʼan taj, kinkamik».

Ester xbʼe cho ri nimalaj rachoch ri ajawinel. Are chiʼ xilitaj rumal ri ajawinel, xulikʼ ri uchʼamiʼy chnuwach. Ester xqebʼik, ri ajawinel xubʼij che: «¿Jas kajwataj  chawe, Ester?». Areʼ xubʼij: «Kwaj che at xuqujeʼ ri Hamán kixpe pa jun nimaqʼij che kinbʼano». Pa ri nimaqʼij riʼ, Ester xeʼusikʼij che jun nimaqʼij chik. Pa ri ukabʼ nimaqʼij, ri ajawinel xutaʼ chi jumul che Ester: «¿Jas kajwataj chawe, Ester?». Ester xubʼij: «Kʼo jun winaq kraj kinukamisaj xuqujeʼ kraj kukamisaj ri nutinamit. Chabʼanaʼ toqʼobʼ, chojakoloʼ». Ri ajawinel xubʼij: «¿Jachin kraj katukamisaj?». Are xubʼij: «Are wajun achi riʼ che sibʼalaj itzel, Hamán». Ri Asuero sibʼalaj xpe royowal che chanim xubʼij che kkamisax ri Hamán.

Are kʼu kʼo ta nijun kkunik kresaj ri taqanik ukojom kan ri Hamán, xuqujeʼ ri ajawinel kkun taj. Rumal laʼ ri ajawinel xubʼano che Mardoqueo xux ajkʼamal bʼe pa kiwiʼ ri príncipes xuqujeʼ xuya che rech kkunik kubʼan chi jun kʼakʼ taqanik. Ri taqanik riʼ kubʼij che ri e judíos kekunik kkitoʼ kibʼ are chiʼ kbʼan kʼax chke. Ri qʼij 13 rech ri ikʼ adar, ri tinamit judío xuchʼak ri e ukʼulel. Xumaj lo pa ri qʼij riʼ, ri judíos xkokʼowisaj ri chʼakanik riʼ ronojel taq junabʼ.