И Естира сине Еврејка која со живинела сине ки персиско диз Суза. Англедер бут берша, о Навуходоносор заробинѓа лакере фамилија хем ингарѓа лен таро Ерусалим. Бајрарѓа ла лакоро братучети о Мардохеј, кова со сине слуга е персиско цареске, е Ахасвереске.

О цари, о Ахасвер, мангља те биринел песке неви царица. Лескере слуге анѓе леске е најшуже чхајен ко цело царство, машкар кола сине и Естира да. Таро са адала, о цари биринѓа е Естира те овел царица. О Мардохеј вакерѓа е Естираке те на вакерел кај тани Еврејка.

Јекх гордо мануш, со викинела пе сине Аман, сине чхивдо упро са о кнезија. Ов мангља са о мануша те поклонинен пе леске. Ама, о Мардохеј на мангља те керел адава. О Аман бут хољанѓа хем мангља те мударел ле. Кеда о Аман шунѓа кај о Мардохеј тано Евреи, керѓа плани те мударел са е Евреен ки пхув. Ов вакерѓа е цареске: „О Евреија тане бут опасна. Мора те ослободина амен лендар. О Ахасвер вакерѓа леске: „Кер адава со мислинеа кај тано најшукар“. Пало адава денѓа ле власт те анел закони. О Аман анѓа закони те мударен пе са о Евреија ко 13-то диве ко масек адар. О Јехова са адава дикхља.

И Естира на џанља башо адава закони. Адалеске о Мардохеј бичхалѓа лаке копија таро закони хем вакерѓа лаке: „Џа ко цари хем кер леа лафи“. И Естира вакерѓа леске: „Секој со ка џал ко цари бизо те овел викимо лестар ка овел мудардо. А манде о цари на викинѓа ман 30 диве! Ама ка џав. Ако пружинела ки манде пло жезол, ка ачховав џивди. А ако на, ка мерав“.

И Естира гели англо цари. Кеда дикхља ла, ов пружинѓа ки лате по жезол. Ој али узи лесте, хем  ов пучља ла: „Со шај те керав баши туте, Естиро?“ Ој вакерѓа: „Мангава те канинав туте хем е Амане ки јекх гозба“. Џикоте сине ки гозба, ој канинѓа лен ки панда јекх гозба. Ки адаја гозба, о цари палем пучља ла: „Со шај те керав баши туте?“ Ој вакерѓа: „Некој мангела те мударел ман хем мле народо. Молинаја тут, спасин амен“. О цари пучља ла: „Кој мангела те мударел тумен? Ој вакерѓа: „Акава лошно Аман!“ О Ахасвер добором хољанѓа со нарединѓа одма те мударен е Амане.

Ама, о закони со анѓа ле о Аман нашти сине никој те поништинел ле, чак ни о цари. Адалеске о цари чхивѓа е Мардохеје те овел упро кнезија хем денѓа ле власт те анел нево закони. О Мардохеј анѓа закони кај о Евреија шај те бранинен пе кеда ка овен нападиме. Ко 13-то диве таро масек адар, о Евреија побединѓе пумаре душманен. Оттегани, ола секова берш славинена сине акаја победа.