И Эсфирь, сави еврейка, жувэлас андо персидско форо Сузы. Ла барярдя лако упэрвых ԥрал, савэс ақарэнас Мардохей. Во сас ек анда слуӷоря, савэ сас кай о персидско царё Ахашверошо.

О Ахашверошо родэлас пэсти авря хулая́. Лэстирэ слуӷоря андэ́ каринг лэстэ само шукарнэ манушнян. Машкар лэндэ сас и Эсфирь. Вой май фартэ всаворэндар чалеля лэ царёсти и во стодя ла, кай вой тэ авэл царица. О Мардохеё мангля ла Эсфиря, кай вой никасти тэ на ԥэнэн, кай вой еврейка.

Барэдэр понад всаворэ князёря сас ек мануш, саво заваздэлас о шэро. Лэс ақарэнас Амано. Во камэлас, кай всаворэ мануша лэсти тэ тэлён. Но о Мардохеё вся время отԥэндёласпэ када тэ терэл. Важ када о Амано фартэ холяйля и закамля лэс тэ умарэл. О Амано уӷангля, кай о Мардохеё евреё. Тоди во загиндосардя тэ умарэл всаворэ евреёнэн, савэ жувэнас андэ кодэя ԥув. О Амано ԥэндя лэ царёсти: «Лэ евреёнэн трэбуй тэ умарэн, важ кода кай вонэ терэна бида». О царё ԥэндя лэсти: «Тер кадя, сар гиндос». О царё мэкля лэс када тэ терэл. Во стодя кацаво законо, андэ саво ԥэнэнпэ, кай андо 13 дес андо шон адаро тэ умарэн всаворэн евреёнэн, савэ жувэнас пэ кодэя ԥув. Вся када диқэлас о Иегова.

И Эсфирь нисо на ӷанэнас пала кадэва законо. Важ када о Мардохеё бишалдя лати письмо, кай сас пистромэ кадэва же законо и ԥэндя: «Жа и подэ дума лэ царёса». И Эсфирь ԥэндя: «Любо мануш, савэс на ақардя о царё и во зажал каринг лэстэ, лэс умарэна. Ай о царё ман уже на ақардя 30 деса! Но мэ жава. Сар во процырдэла каринг мандэ о жезло, тоди манца нисо на авэла, ай сар най, тоди ман умарэна».

И Эсфирь зажыля андэ града, кай жувэлас о царё. Кала о царё додиқля ла, во процырдя каринг латэ о жезло. Вой  поджыля каринг лэстэ и во пушля латар: «Эсфирь, со мэ важ тутэ тэ стерав?» Вой ԥэндя: «Камав тэ ақарав тут и лэ Аманос по празднико». И Эсфирь ақардя лэн пэ кадэва празднико и пэ авэр дес. Кала сас о дуйто празднико, о царё упалэ пушля латар: «Со мэ важ тутэ тэ стерав?» Вой ԥэндя: «Ек мануш камэл ман тэ умарэл и всаворэ мэрнэ народос. Мангав тут, фэрисар амэн». О царё пушля: «Ко камэл тэ умарэл тумэн?» И Эсфирь ԥэндя: «Кадэва найлашо мануш, о Амано». О Ахашверошо кадя росхоляйля, кай йто приԥэндя тэ умарэн лэ Аманос.

Но нико нащи сас тэ парувэл кадэва законо, даже о царё. Важ када о царё стодя лэ Мардохеёс, кай во тэ авэл барэдэр понад князёря и ԥэндя, кай во тэ стол авэр законо. О Мардохеё стодя нэво законо, кай и евреёря тэ фэринпэ. Андо 13 дес андо шон адаро и евреёря вицэлдэ и война, сави сас лэндэ лэ вороӷонэнца. Кадэла времятар вонэ линэ тэ стон кажно бэрш празднико, кай вицэлдэ кадэя война.