Asteeri yinanniti Ayihuditte beetto Suusa yinannihu Faarsi katamira heedhanno. Lowo diri albaanni, Nabukadanatsoori fiixase Yerusaalametenni qafade haaˈre haˈrino. Asteeri Merdokiyosi yinannihu wosiilise beetti lossinose; isi Faarsi Moote Arxekisisi soqqamaanchooti.

Moote Arxekisisi wole mootitte adhate kai. Soqqamaanosi, duucha xumuulle seenne hasse abbitusi; kuri seenni giddo mitte Asteeriiti. Moote wole seenne baala agure mootitte ikkitanno gede Asteeri doodhino. Merdokiyosi Asteeri, ‘Ayihudete gaˈre ikkoottata mannaho kultooti’ yiinose.

Haama yinannihu gashshaano baalate aliidihu booˈnaleessu manchi no. Isi mannu baalu kumbuulasira hasiˈrino. Merdokiyosi kayinni isira kumbuula giwi; tennera Haama lowo geeshsha hanqe iso shaara hasiˈri. Haama, Merdokiyosi Ayihudete gaˈre ikkinota afiti, Ayihudete manna baala shaate mixiˈrino. Isi mootete togo yii: ‘Ayihudete manni atera dielannohena, konne manna shine gundanni gede assi.’ Arxekisisi Haama, ‘Insa hasiˈritto gede assa dandaatto’ yiisi, hattono seera fushshanno gede silxaane uyinosi. Hakkiinni Haama Adaari yinanni agani eihunni 13^ki barra Ayihudete manna baala shine gundanni gede seera fushshi. Yihowa tenne laˈˈanni no.

Asteeri konne seera fushshinoonnita diaffino. Konni daafira Merdokiyosi isera, ‘Marte moote hasaawisi’ yee sokka soyi. Asteeri togo yitu: ‘Mittu manchi woshshinisikki mootete minira eiro shinanni. Moote ane woshshienku sajjoo barra ikkino! Marate wote mareemma. Isi gashshootu siqqosi ane albaanni diriirsiro gateemma. Diriirsa hoogiro kayinni shinannie.’

Asteeri moote noowa martu. Moote ise laiti gashshootu siqqosi diriirsi. Hakkiinni isiwa shiqqi yituta, ‘Asteeri maa assammohera hasiˈratta?’ yee xaˈmise. Asteeri, ‘Techo hawarro atinna Haama jiloomma  jilira dagginara hasiˈroommo’ yitusi. Insa jilaho dagge heedheenna, ise lamunku layinkimeeshsho jiltanno jilirano dagganno gede koyissu. Layinki jili yannara, xaano moote ‘Maa assammohera hasiˈratta?’ yee xaˈmise. Asteeri qolte, ‘Anenna mannaˈya shaankera hasiˈrino manchi noona gatisinke ballo’ yitu. Moote qole, ‘Kiˈne shaara hasiˈrinohu ayeti?’ yee xaˈmi. Iseno, ‘Shaankera hasiˈrinohu konne busha mancho Haamaati’ yitu. Arxekisisi lowo geeshsha hanqe, hakkawoyintenni Haama shinanni gede assi.

Haama fushshino seera moote nafa soorra didandaanno. Konni daafira Moote Arxekisisi, Merdokiyosi gashshaano baalate aliidiha asse shoome, wole seera fushshano gede silxaane uyisi. Merdokiyosi, Ayihude kinsanninsa woyite umonsa gargadha dandiitannota kulanno seera fushshi. Hakkiinni Adaari yinanni agani eihunni 13^ki barra Ayihudete manni diinnansa qeeli. Hakko barrinni kayise Ayihude diru baala diinnansa qeeltino barra ayirrissanno.