Eshitele baadi nsongwakashi mwina Yuuda baadi mwiumbo dya Perse mu Suse. Bipwa bibungi kunyima, abakwatshile kifuko kyaye mu Yeelusaleme kwi Nabukodonosore. Eshitele abaadi bamukushe kwi Mordekayi mukwabo a mu kifuko, baadi mufubi a Nfumu Kesersese a mu Perse.

Nfumu Kesersese baadi aakimbi ndalamumba mupya. Bafubi baaye nkumutwadila bana bakashi beebuwa booso ba mu dyadya eumbo mpa na Eshitele. Mu baaba booso bakashi, nfumu baadi musangule Eshitele bwa kwikala bu ndalamumba. Mordekayi baadi mutoshe Eshitele bwa kupela kwiukisha ungi muntu shi aye baadi mwina Yuuda.

Hamane baadi na kwitatula nyi baadi muntu a kabidi kunyima kwa nfumu. Baadi akimbi bwa shi muntu ooso amukunamine. Anka Mordekayi baadi mupele kukita byabya, nyi bwakinyi Hamane baadi mumufiitshile munda aye nkukimba bwa kumwipaa. Pabaadi Hamane mutundule shi Mordekayi baadi mwina Yuuda, baadi mwate mpàgo bwa kwipaa beena Yuuda booso abaadi mwiumbo. Baadi mulungule nfumu shi: ‘Beena Yuuda be na binangu bibubi, abitungu webashimishe.’ Kesersese nkumulungula shi: ‘Kita byoso byokumiina,’ aye nkumupa matalwa a kutusha mwiya. Hamane nkwela mwiya aupa bantu matalwa shi mwifuku dya 13 dya mweshi wa Adare, abitungu kwipaa beena Yuuda booso. Anka Yehowa baadi amono.

Eshitele tabaadi auku bibaadi abyakula mwiya nya. Mordekayi nkumutumina mukanda amulungula shi: ‘Enda okesambe na nfumu.’ Eshitele nkulungula Mordekayi shi: ‘Muntu ooso atwele kwi nfumu kwabashii bamwitanyine, e na kya kwipayiibwa. Takudi mafuku 30 kushii nfumu kungitanyina! Anka ne kwenda. Su eela elanga dyaye mwiyilu, nashaala na muwa. Kadi su apela kwidyela mwiyilu, abangipaa.’

Eshitele baadi mwende mwibalasa dya nfumu. Nfumu pabamumwene, baadi mumutambikye elanga dyaye. Eshitele nkwifubwila kwadi, nfumu nkumwipusha shi: ‘Ne kukukitshina kinyi Eshitele?’ Aye  nkumwaluula shi: ‘Nakyebe kwinwitanyina na Hamane ku madyo ku kyolwa.’ Pabaabadi ku madyo, Eshiteele baadi mwibetamine dingi musango wa kabidi. Pabaabadi ku madyo wawa musango wa kabidi, nfumu baadi mumwipushe dingi shi: ‘Ne nkukitshina kinyi Eshitele?’ Aye nkumulungula shi: ‘Kwi muntu akyebe kungipaa na mwilo wande. Etupaashe namu.’ Nfumu nkumwipusha shi: ‘Nnanyi akyebe kwinwipaa?’ Aye nkumulungula shi: ‘Nyi nguno muntu ebubi Hamane.’ Kesersese nkufiita munda bikata, aye nkuteka bwabadya kwipaa Hamane.

Kadi, takubaadi muntu a kukatusha mwiya wa Hamane nya, nsunga nfumu nabeene. Nfumu nkutuula Mordekayi bu muntu a kabidi kunyima kwaye, aye nkumupa matalwa a kweela ungi mwiya upya. Mordekayi nkutuusha mwiya aupa beena Yuuda matalwa a kwikalwila p’abebatuuku ngoshi. Mwifuku dya 13 dya mweshi wa Adare, beena Yuuda nkutshokola beshikwanyi nabo. Kubanga paapa, ababangile kutentekyesha kutshokola kwabo ku kipwa kyooso.