Ester kai sěngkatau mahuala Yahudi mětẹ̌tanạ su soa Syusyan su Persia. Pul᷊one su taunge tamai, kěluargane niwawa bọu Yerusalem karạ u datu Nebukhadnezar. Ester nihiking i Mordekai, anạu tahatuarine. I Mordekai ene kai ělang i Ahasweros, datung Persia.

Datu Ahasweros mapulu měmile ratu wuhu. Ělange nẹ̌bawa manga wawine sěbạe masadadạ su kararatuang ene, kụ i Ester lai niwawa. Datu němile si Ester nakoạ ratu. I Mordekai nẹ̌sěding si Ester mẹ̌běke i sie kai tau Yahudi.

Sěngkatau esẹ maobotẹ̌ arenge Haman, měngẹ̌ngawasa kěbị pejabat. I sie mapulu kěbị taumata mẹ̌tumpěkuhẹ̌ su těngone. Katewe, i Mordekai madiri. Haman sěbạe nẹ̌pědu kụ mapulu měmate si Mordekai. Su tempong nakasingkạ i Mordekai ene tau Yahudi, i Haman někoạ rencana gunang měmate kěbị tau Yahudi su kararatuang ene. I sie naul᷊ị su Datu, ’Tau Yahudi ene makawahaya. I Tuang harusẹ̌ měmate si sire.’ Datu Ahasweros nẹ̌bera, ’Koạe apa ikẹ̌kapulunu.’ Datu něgělị si sie kawasa gunang měkoạ atorang. Bọu ene, i Haman někoạ atorang tadeạu tau Yahudi pateng su ěllo kapul᷊o tělune su wul᷊ang Adar. Yehuwa měmẹ̌manda apa nikoạe.

I Ester běga soal u atorang ene. Hakị u ene, i Mordekai něndoho salinan atorang ene si sie kụ něgělị tatanata, ’Pẹ̌bisarako dingangu datu.’ Ester naul᷊ị, ’Taumata apang tumatěngo su Datu kụ tawe nikui, sarung pateng. Seng 30 su ěllone iạ tawe nikuing Datu! Katewe, iạ mang matamai. Mạeng i sie měngul᷊uhẹ̌ těkinge, iạ měbiahẹ̌. Katewe mạeng tala, iạ sarung mate.’

Ester nakoạ sarang rělahu istana. Su tempong nakasilo si sie, Datu něngul᷊uhẹ̌ těkinge. Datu nẹ̌kiwal᷊o si Ester, ’I kau mapulu apa, Ester? I sie simimbahẹ̌, ’Iạ mapulu i Tuang dingangi  Haman duměnta su pesta sarung koatengku.’ Su pesta ene, Ester saụ nẹ̌dorong si rẹ̌dua gunang duměnta su pesta karuane, su ěllo tuhụe. Su pesta karuane, Datu nẹ̌kiwal᷊o, ’I kau mapulu apa?’ Ester naul᷊ị, ’Piạ u mapulu měmate si siạ dingangu bangsaku. Tul᷊ungko ambange i kami.’ Datu nẹ̌kiwal᷊o, ’I sai tau ene?’ I Ester naul᷊ị, ’Tau dal᷊akị ene ute i Haman.’ Ahasweros sěbạe nẹ̌pědu kụ apidu něngoro tadeạu i Haman pakipate.

Katewe, tawẹ apa wotonge makawal᷊ui atorang seng nikoạ i Haman. Sarang Datu lai tawe makawal᷊ui. Hakị u ene, Datu něhengkẹ si Mordekai nakoạ měngangawasa gunang manga pejabat, kụ něgělị kawasa si sie gunang měkoạ atorang buhu. Mordekai někoạ atorang buhu gunang měgěli izin su tau Yahudi lumawang su tempong piạ u měmate si sire. Su ěllo kapul᷊o tělune su wul᷊ang Adar, tau Yahudi nakauntung limawang sědụ i sire. Něnětạ tempo ene, i sire turusẹ̌ měkẹ̌koạ acara sabang taung gunang mẹ̌tahěndung kal᷊auntung ene.