ISTÓRIA 65
Ester salva Jeová nia povu
Ester mak feto Judeu ida neʼebé hela iha sidade Susan iha rai-Pérsia. Ester nia primu Mordecai mak haboot nia. Mordecai mak atan ida ba liurai Pérsia naran Assuero.
Liurai Assuero buka liurai-feto foun. Ninia atan sira lori ba nia feto bonita sira iha Pérsia, inklui Ester. Ikusmai liurai hili Ester atu sai liurai-feto. Mordecai hatete ba Ester atu labele fó sai katak nia mak ema Judeu.
Mane foti an ida naran Haman mak xefe ba ulun-naʼin hotu. Nia hakarak ema hotu hakruʼuk ba nia. Maibé Mordecai lakohi, tan neʼe Haman sai hirus tebes no hakarak atu oho nia. Bainhira Haman hatene katak Mordecai mak ema Judeu, nia halo planu atu oho ema Judeu hotu iha Pérsia. Haman dehan ba Liurai Assuero: ‘Ema Judeu la halo tuir liurai nia lei, Ita tenke oho sira.’ Liurai dehan: ‘Halo bá tuir ó-nia hakarak.’ Liurai fó lisensa ba Haman atu halo lei ida. Tuirmai Haman halo lei neʼebé haruka povu atu oho ema Judeu hotu iha loron 13 fulan-Adar. Jeová hatene Haman nia planu aat.
Ester la hatene kona-ba neʼe. Tan neʼe, Mordecai haruka kópia kona-ba lei neʼe ba Ester no husu nia atu koʼalia ho liurai. Ester dehan: ‘Se ema ida bá hasoru liurai maski liurai la bolu, ema neʼe sei mate. Liurai seidauk bolu haʼu ba loron 30 ona. Maibé haʼu sei bá. Se nia lolo ninia ai-tonka, haʼu sei moris. Se lae, haʼu sei mate.’
Ester bá liurai nia palásiu. Bainhira liurai haree Ester, nia lolo ninia ai-tonka. Ester hakbesik ba liurai, no liurai husu: ‘Ó hakarak saida?’ Ester hatán: ‘Haʼu hakarak konvida Liurai no Haman atu tuir festa.’ Iha festa neʼe, Ester konvida sira naʼin-rua atu tuir festa ida tan. Durante festa segundu, liurai husu dala ida tan: ‘Ó hakarak saida?’ Ester dehan: ‘Ema ida hakarak oho haʼu no haʼu-nia povu. Favór salva ami.’ Liurai husu: ‘Sé mak hakarak oho ó?’ Ester hatán: ‘Mane laran-aat neʼe mak Haman.’ Liurai hirus tebetebes no haruka ema oho kedas Haman.
Maibé la iha ema ida mak bele troka Haman nia lei, liurai mós labele. Tan neʼe, liurai hili Mordecai atu sai nuʼudar xefe ba ulun-naʼin hotu no haruka nia atu halo lei foun. Mordecai halo lei ida neʼebé fó lisensa ba ema Judeu sira atu defende an kuandu inimigu ataka sira. Iha loron 13 fulan-Adar, ema Judeu manán sira-nia inimigu. Husi tempu neʼebá, sira selebra loron neʼe tinan-tinan.
“Sira mós sei lori imi ba governadór no liurai sira-nia oin tanba haʼu. No imi sei fó sasin ba sira no ba nasaun seluk.”—Mateus 10:18.
Karik Ita sei gosta
VÍDEO INTRODUSAUN KONA-BA LIVRU SIRA IHA BÍBLIA
Introdusaun ba livru Ester
Istória kona-ba Ester ajuda ita atu hametin ita-nia fiar ba Maromak Jeová nia kbiit atu salva ninia povu husi susar oioin neʼebé mosu ohin loron.
BANATI-TUIR SIRA-NIA FIAR
Nia hamriik hodi ajuda Maromak nia povu—Ester
Atu tau ita-nia moris iha perigu laran hodi ajuda ema seluk hanesan buat neʼebé Ester halo, presiza duni fiar no brani.
BANATI-TUIR SIRA-NIA FIAR
Nia hatudu matenek, aten-brani, no la hanoin an deʼit—Ester
Iha dalan saida mak Ester hatudu hahalok la hanoin an deʼit?
